Kryetari i Lëvizjes Besa në Maqedoni, Bilall Kasami, ka rikujtuar se sot mbushen plotë katër vite nga rasti makabër “Monstra” në Liqenin e Smillkovës, në të cilin u vranë pesë maqedonas, ndërsa për fajtor u shpallën 6 shqiptarë me burg të përjetshëm.
“Sot janë mbushur 4 vite nga vrasja e pesëfishtë në Smilkovë të Shkupit, ku u vranë katër të rinj dhe një peshkatar maqedonas. Kjo ngjarje e rëndë do të mbahet mend edhe për monstruozitetin e qeverisë Gruevski – Ahmeti, e cila arrestoi dhjetëra burra dhe gra me dyshimet se ishin pjesë e realizimit të vrasjes, pa pasur asnjë provë të vetme, vetëm ngaqë ishin shqiptar!
Sot, 4 vite më pas, pos që bashkohemi me dhembjen e familjarëve, të cilët kanë humbur të afërmit dhe me ata që u përbuzën nga forcat policore, ripërsërisim se Maqedonia kurrë më nuk do të jetë vend ku politika do të “ndajë” drejtësinë. “Monstrat politke” Nikolla Gruevski dhe Ali Ahmeti nuk e kanë të gjatë. Drejtësia për ta do të vijë nga populli!”, ka kujtuar Kasami.
Në opinionin e gjerë në Maqedoni për rastin Monstra thuhet se është një ndër rastet më të montuara që ka njohur historia e Maqedonisë. Për momentin katër shqiptarë po vuajnë burgun e përjetshëm, ndërsa dy të tjerë ndodhen në arrati në Kosovë.
Ajo që e bën më paradoksale qëndrimin e shqiptarëve të pafajshëm në burgjet maqedonase, është fakti që ata u dënuan ndërkohë që disa ministra shqiptarë udhëhiqnin me dikasterin e Ministrisë së Drejtësisë. /tesheshi.com/
