Formimi i qeverisë së re është tema më aktuale në politikën kosovare kjo për shkak se koalicioni fitues PDK-AAK-NISMA nuk ka numrat e nevojshëm prej 61 deputetë, ndërsa Vetëvendosje dhe LDK po insistojnë se ato do e formojnë në rast dështimit të PAN.
Dhe në këtë situatë është presidenti Thaçi që do e thotë fjalën e fundit. Për këtë çështje së fundmi ka folur ish- kryetari i Gjykatës Kushtetuese, Enver Hasani i cili shpejgon gjithë rrugën që presidenti duhet ta ndjek për formimin e qeverisë, në bazë të Kushtetutës, ligjeve dhe aktgjykimit të Gjykatës Kushtetuese të vitit 2014.
Sipas Hasanit, qeverinë mund ta bëjë edhe ndonjë parti tjetër që nuk ka dal e dyta, por që dëshmohet se ka shumicën në Kuvend herën e dytë , sepse sipas tij pas shfrytëzimit të herës së parë, në Kuvend flitet për rikonfigurim të forcave politike.
Hasani në një intervistë për “KosovaPress” vlerëson se Thaçi do të bëjë shkelje të rëndë kushtetuese, në qoftë se nuk ia jep mundësinë në herën e dytë për formimin e qeverisë partisë apo koalicionit që ka shumicën në Kuvend.
Hasani ka thënë se me aktgjykimin e vitit 2014 kushtetuesja ka vendosur që herën e parë mundësinë për formimin e qeverisë t’ia jap partisë apo koalicionit fitues të zgjedhjeve. Por, në rast të dështimit në herën e parë, sipas Hasanit, herën e dytë është në diskrecion të shefit të shtetit që t’ia jap mandatin atij koalicioni, apo asaj partie që e vërteton se e ka shumicën në Kuvend. /tesheshi.com/
