Kryetari i Komisionit Qendror të Zgjedhjeve, Denar Biba thotë se është e pamundur të shtyhen zgjedhjet ligjërisht më shumë se një javë. Duke folur për “Tonight Ilva Tare”, ai sqaroi se që kjo të ndodhë duhet marrëveshje politike e nivelit të lartë pasi duhet ndryshuar kodi zgjedhor.
Lidhur me mundësinë e bojkotit të zgjedhjeve të opozitës, Biba tha se pa Partinë Demokratike do të ketë votime, por nuk mund të ketë zgjedhje. Për kreun e KQZ, 10 prilli si afat i fundit i regjistrimit të partive, nuk është i pandryshueshëm, dhe nëse Partia Demokratike vendos të regjistrohet, këtë mund ta bëjë deri ditën e prodhimit të fletës së votimit
Megjithatë, në KQZ kanë aplikuar rreth 200 qytetarë të paangazhuar për të marrë vendet e komisionerëve të PD nëpër komisonet zonale të administrimit zgjedhor, nëse këta të fundit bojkotojnë.
Për sa i përket ligjit të dekriminalizimit, Biba tha se ky është një ligj i cili ka probleme në kuadër të të drejtave të njeriut. Biba tha se KQZ nuk ka kapacitetet e nevojshme për të kryer verifikimin e figurës së kandidatëve përpara zgjedhjee sepse janë vetëm 3 persona që duhet të verifikojnë më shumë se 6500 kandidatë për një periudhë të shkurtër kohore.
Ndërkohë, pyetur për hetimin që ka nisur prokuroria lidhur me KQZ, ai thotë se herët a vonë do të shfryhet.
“Nuk ka ndodhur ndonjëherë që jemi në hetim 4- 5 muaj para zgjedhjeve. Është një hetim që herët a vonë do të shfryhet. Asnjëherë nuk kam dashur të besoj se ka konflikt mes KQZ e Prokurorisë, pasi prokuroria ëhstë i vetmi partner që kemi në këtë proces. Ne të dy kemi qëllim të përbashkët pastrimi i politikës nga elementë kriminalë. Ky nuk është qëllim personal por institucional. Nuk besoj se ka konflikt por ne jemi përballur në këndvështrime të ligjit”, theksoi Biba.
Më 16 shkurt 2017 Prokuroria e Tiranës regjistroi procedimin penal ndaj KQZ-së duke e akuzuar për shkelje ligjore si për rastin e deputetit socialist Armando Prenga ashtu dhe për dy kryetarë bashkie. /tesheshi.com/
