Një deklaratë e fortë ka ardhur nga një prej krerëve të Kishës Ortodokse Serbe, pikërisht numri dy i saj dhe kreu i Kishës serbe në Mal të Zi.
Metropoliti Amfilohije ka akuzuar presidentin serb Aleksandër Vuçiç se po e dorëzon Kosovën në duart e shqiptarëve përfundimisht.
Gjatë një meshe që zhvilloi në Cetinjë, ditën e Krishlindjeve Ortodokse, Amfilohije Radoviç, i cili njhet si antishqiptar i thekur, e akuzoi Vuçicin se me politikën e jashtme “po tradhëton Serbinë dhe Kosovën”.
Madje metropoliti shkoi edhe më tej, kur përgatiti një peticion që e quajti “Apel për të mbrojtur Kosovën”.
Ka ardhur e menjëhershme përgjigja e presidencës serbe, por jo nga vetë Vuçiç, i cili ka thënë se do të flasë vetëm më 14 janar.
Nikola Selakoviç, ish-ministër i Drejtësisë, aktualisht Sekretar i Përgjithshëm i Presidencës tentoi të çdramatizojë situatën, gjatë një deklarate në televizionin publik serb.
“Metropoliti Amfilohije i ka bërë dy herë funeralin presidentit Vuçiç, por ai është gjallë dhe si kokra e mollës. Madje mëse një herë ka bërë magji për të ndryshuar trurin e presidentit.
Ndërkohë që parardhësit e Vuçicit kanë zvogëluar numrin e serbëve në Mal të Zi, presidenti po shton numrin e serbëve të Kosovës”, tha Selakoviç.
Deklarata e dinjitarit të lartë të Kishës serbe ka tronditur shumë qeveritarët serbë, të cilët kanë dalë menjëherë në mbrojtje të presidentit.
Amfilohije nuk është thjeshtë krahu radikal i Kishës serbe, por është edhe njeriu më i rëndësishëm i Patriakanës ruse, që gjithashtu ndikon shumë në zhvillimet politike në Republika Srbska.
Sllobodan Millosheviç, i cili nuk pëlqehej shumë nga prifti i Cetinjes, vendosi të gjithë njerëzit që ky i fundit ka propozuar për në krye të vendit, që nga Qosiç e deri tek miliarderi Milan Paniç. Të njëjtën gjë bënë edhe ata që u zgjodhën pas Millosheviçit.
Amfilohije Radoviç është ai që “bekoi” Vojisllav Koshtunicën dhe parardhësin e Vuçicit, Tomislav Nikoliç.
Sipas të gjitha gjasave, deklarata e kreut të Kishës serbe është një paralajmërim për të ndalur rrugën e shpallur drejt dorëzimit të Kosovës.
Por nuk përjashtohet që të jetë edhe lojë “e të keqit me të mirin” që dirigjohet nga Beogradi për të marrë sa më shumë konçensione nga SHBA dhe BE-ja.
Amfilohije Radoviç, i cili lëshon deklarata të “çmendura”, nuk është një i krisur. Ai flet pesë gjuhë të huaja dhe është profesor i rëndësishëm i teologjisë; e ka dhënë mësim në Paris, Moskë, Beograd dhe Athinë.
Ai ka qenë miqësi me Anastas Janullatosin, kreun e Kishës Ortodokse të Shqipërisë, i cili e ftoi në Tiranë gjatë përurimit të Katedrales ortodokse në kryeqytetin shqiptar.
Amfilohije nuk është thjesht një klerik, por një drejtues kishe që ka bërë politikë gjatë gjithë karrierës së tij. Ai ka qenë mentori dhe njeriu më i afërt i Radovan Karaxhiçit, i dënuar për krime luftë nga Gjykata e Hagës.
NATO-n, Metropoliti i kishës serbe në Mal të Zi, e ka cilësuar një “organizatë terroriste” dhe ka mallkuar Milo Gjukanoviçin për “largimin prej “Nënës Rusi”. /tesheshi.com/
