Pas tragjedisë në Genova, si kudo në Europë, edhe në Shqipëri po rishikohet gjendja e urave.
Drejtori i ARRSH-së, Afrim Qendro, në një dalje për mediat nuk e konsideroi si emergjente situatën e urave te ne dhe shtoi se së shpejti do ketë ndërhyrje në disa prej tyre
“…pavarësisht ngjarjes që ka ndodhur në Itali, ne kemi kërkuar në buxhet që vitin e kaluar për të bërë projekte për urat të cilat janë më problematike në Shqipëri, që kërkojnë ndërhyrje. Janë bërë të njohura në shtyp se cilat janë këto objekte. Është hapur një garë që është në proces final. Brenda dy javëve do kemi kontratën me kompaninë fituese që do bëjë projektin me të gjitha elementët teknikë që duhet të bëjmë ne ndërhyrje për urat sipas listës”.
Problemi më i madh sipas Qendros, është mosrespektimi i tonazhit të përcaktuar kur kalohet mbi një urë.
“Kemi një problem shumë të madh. Kemi disa kompani që nuk respektojnë korrektësisht peshën mbi aks, si kompanitë që shfrytëzojnë lumenjtë, kompanitë e naftës, kompanitë e kromit dhe ndërtimit. Duhet të respektojnë në mënyrë rigoroze peshën mbi aks. Urat projektohen për një jetëgjatësi prej 100 vjetëesh por me një peshë të caktuar mbi aks dhe duhet të bëjmë shumë kujdes, sidomos policia rrugore”, theksoi Qendro. /tesheshi.com/
