Në një prononcim për Zërin e Amerikës, drejtori i ODIHR Michael Georg Link, ka folur mbi zgjedhjet e ardhshme parlamentare në Maqedoni.
Sipas tij, është e drejtë e partive politike që të dakordohen për datën e zgjedhjeve dhe se këtu nuk do të ndërhyjnë askush. Mirëpo Link ka siguruar që ODIHR do të sigurojë monitorim të plotë të zgjedhjeve të ardhshme pavarësisht se kur do të mbahen ato.
“Ne e dimë se në Maqedoni ka diskutime të vazhdueshme për të përcaktuar datën e saktë për zgjedhjet dhe ne nuk do të ndërhyjmë në negociatat politike për këtë temë. Kjo sigurisht varet nga shoqëria, qeveria, opozita, palët e përfshira. Megjithatë, ne jemi të përgatitur për të monitoruar zgjedhjet, pavarësisht nëse ajo do të ndodhë herët a vonë”, ka deklaruar Michael Georg Link.
Tek opozita në Maqedoni, por tek i gjithë opinioni publik në përgjithësi, ekziston frika se zgjedhjet do të manipulohen. Këtë dyshim të shndërruar në bindje, e ka shkaktuar proçesi i zgjedhjeve të fundit lokale, ku siç u vërtetua në kohë, pati shumë manipulime, sidomos me listat zgjedhore. Dje, u vunë prangat e para për këto manipulime të përfolura, ku kreu i Komunës së Pustecit, Edmond Themelko, u ndalua nga policia më këtë akuzë. /tesheshi.com/
