KFOR-i ka qenë i gatshëm për të ndërhyrë në të gjitha zonat e Kosovës të vizituara nga presidenti i Serbisë, Aleksandar Vuçiç, tha komandanti i misionit ushtarak ndërkombëtar, gjeneral Salvatore Cuoco, një ditë pas një incident u shënua në vizitën dy-ditore. Ishin grupe shqiptarësh ata të cilët nuk lejuan që Vuçiç të vizitonte një fshat serb në Skënderaj të Drenicës, duke kërkuar prej tij që të kërkojë falje për krimet serbe. Kjo sigurisht nuk ndodhi, siç nuk ndodhi dhe takimi i tij me serbët e Banjës, një enklave në zonën e Drenicës, aty ku është shkruar historia e Kosovës në përballje me serbët.
Gjenerali Cuoco tha se vizita Vuçiç kaloi nga një siguri e garantuar, pavarësisht se nuk u lejua të shkojë në fshatin Banjë.
“Ne ishim të gatshëm për të ndërhyrë. Por mendoj se ishte një vendim i mençur i kryetarit tuaj për të mbajtur situatën e qetë dhe për të shmangur ndonjë konflikt”, tha Cuoco për TV e Beogradit për herë të parë.
Ai kujton se KFOR-i në Kosovë është faktori i tretë në reagim, pas Policisë së Kosovës dhe EULEX-it.
“Nëse do të kishim ndërhyrë, situata do të ishte ndryshe dhe ndoshta vizita do të kishte vijuar ndryshe. Ndaj mendoj se vizita ishte e suksesshme në aspektin e sigurisë. Dhe mosndëryrja jonë ishte në funksion të shmangies së çdo tensionimi”, shpjegoi ai.
Komandanti i KFOR-it tha se askush nuk ishte në rrezik në Kosovë, përfshirë dhe vetë Vuçcin, kur shqiptarët ia bllokuan kalimin për në enklaën serbe.
Ai theksoi se në të gjitha vendet po zhvillohen protesta, porse kjo nuk do të thotë që siguria e dikujt është e kërcënuar dhe se dikush është në rrezik.
“Unë mendoj se askush nuk ishte në rrezik. As presidenti i Serbisë. Protesta mund të ketë në çdo vend, por kjo nuk do të thotë se ato rrezikojnë sigurinë e dikujt”, tha gjenerali Cuoco.
Ai shtoi se protestuesit mund të sulmojnë verbalisht, të përdorin fjalët që duan, por ata nuk e vënë askënd në rrezik.
I pyetur nëse Rezoluta e Këshillit të Sigurimit 1244 është ende “Bibla për ta”, gjenerali italian u përgjigj me besnikëri: “Po, është Bibla e vetme që kemi. Të tjerët nuk kanë, por për ne është e detyrueshme për sa të jemi të pranishëm në Kosovë”, tha Cuoci.
Dhe duke daleë pak nga linja ushtarake e futur në atë politike, gjenerali tha se dialogu mes Serbisë dhe Kosovës është mjeti kryesor që të dyja palët kanë.
“Çfarëdo që të ndodhë, dialogu në Bruksel është një nga mjetet me të cilat ata mund të vijnë në një marrëveshje. Unë mendoj se çdo zgjidhje paqësore do të jetë e vlerësuar për të gjithë. Sipas mendimit tim modest, të gjithë duhet të punojnë për të arritur këtë zgjidhje paqësore”, theksoi komandanti i KFOR-it.
Për ata që jetojnë në Kosovë, shtoi ai, “më e rëndësishme është që të kemi një paqe përfundimtare dhe të qëndrueshme, e cila do të çojë në normalizimin e marrëdhënieve, me qëllim që njerëzit të kenë zgjidhjen më të mirë për të ardhmen dhe prosperitetin e tyre.”
“Kufijtë janë të rëndësishme, por në qoftë se objektivi kryesor është për t’u bashkuar me Bashkimin Evropian, kufijtë shpejt do të humbasin rëndësinë e tyre”, shtoi Cuoco. /tesheshi.com/
