Kreu i FRPD, Belind Këlliçi u ka bërë thirrje të rinjve shqiptarë që ditën e hënë të bashkohen dhe të marrin në dorë fatet e vendit, sikurse 25 vite më parë, ndërkohë që gjendja në vend po shkon keq e më keq, ekonomia po zhytet thellë e më thellë në krizë, papunësia rritet, pamundësia për të vazhduar studimet shtohet.
“Të hënën ne duhet të jemi të gjithë sëbashku, të djathtë, të majtë e të pa parti sepse ne të gjithë po vuajmë njësoj, të gjithëve njësoj po na e vrasin shpresën qeveritarët e sotëm që të vetmin shqetësim që kanë, është të shtojnë pasuritë e tyre marramendëse”,- tha Këlliçi.
Ai u shpreh se thirrja për çdo të ri vjen nga padrejtësia e thellë, ku gjysma e shqiptarëve janë goditur në bukën e gojës, ndërsa Edi Rama dhe ministrat e tij renditen mes njerëzve më të pasur në Europë.
“Thirrja vjen për çdo të ri i cili në pamundësi për të gjetur një vend pune sheh si zgjidhje largimin nga vendi. Thirrja vjen për çdo të ri që sheh dhe ndjen dhimbjen e prindërve që s’kanë mundësi të paguajnë faturat e rritura të energjisë, ndërkohë që në kurrizin tonë Edi Rama mbylli pazarin e turpit me CEZ, plot 600 milion euro”,- ishin disa nga fjalët e kreut të FRDP./tesheshi.com/
