Në një intervistë për TemA TV, ambasadori britanik, Nicholas Cannon, tha se hetimi i ngjarjeve të 21 janarit duhet të shkojë deri në fund, për të zbuluar personat përgjegjës dhe pastaj për të ndërmarrë veprimet e duhura
Ai theksoi se është domosdoshmëri të vihet drejtësi për këtë ngjarje, duke e konsideruar si një ndër më tragjiket në historinë e Shqipërisë.
“Ajo çka ndodhi më 21 janar ishte një ndër ngjarjet më tronditëse dhe tragjike në historinë e Shqipërisë dhe është e rëndësishme që hetimi t’i shkojë ngjarjeve deri në fund, për të kuptuar si ndodhi, për të zbuluar personat përgjegjës dhe pastaj për të ndërmarrë veprimet e duhura.
Është e rëndësishme pjesërisht, sepse familjarët e atyre që humbën jetën, me të drejtë kërkojnë që drejtësia të vihet në vend për të dashurit e tyre.
Por hetimi i çështjes është i rëndësishëm gjithashtu për të garantuar që ngjarje të tilla të mos ndodhin më.
Këto ngjarje mund të shmangen vetëm nëse çështjes i shkohet deri në fund, nëse ka një hetim rigoroz dhe nëse përcaktohet përgjegjësia për çka ndodhi.
Edhe pas pesë vitesh 21 janari mbetet një ngjarje aktuale, e cila duhet adresuar në kohë”, tha ambasadori britanik.
Sipas tij, nëse nuk do ketë të ndëshkuar për këtë ngjarje, ajo ka gjasë të përsëritet. /tesheshi.com/
