Ministri i Arsimit në Kosovë, Arsim Bajrami gjatë një vizite të bërë në shkollën fillore ‘Dardania’ të Prishtinës me rastin e fillimit të gjysmëvjetorit të dytë ka folur për problematikën e bartjes së çantave të rënda nga filloristët kosovarë.
Ai ka thënë se Ministria që drejton për herë të parë është duke e trajtuar këtë çështje.
“Për herë të parë problemi i çantave të rënda, apo të stërngarkuara është duke u trajtuar në Ministrinë e Arsimit dhe është marrë shumë seriozisht dhe po e trajtojmë në tri segmente.
E para kemi përgatitur udhëzimin administrativ që secila shkollë e re që ndërtohet të ketë hapësira për ruajtjen e librave dhe me standarde të ndërtimit asnjë shkollë nuk do të ndërtohet nëse nuk ka edhe vitrina për ruajtjen e librave.
E dyta do të jetë reduktimi i librave dhe sidomos vëllimi i teksteve. Jemi duke i rishikuar tekstet dhe ato duhet të jenë të dobishme dhe praktike dhe momenti i tretë në mënyrë graduale do ta vendosim librin elektronik.
Do të fillojmë me disa lëndë ekzakte –natyrore, por më vonë do të fusim edhe lëndë tjera në mënyrë që problemi i çantave të stërngarkuara të tejkalohet”, tha Bajrami.
Shqetësimin për bartjen e çantave të rënda nga filloristët e Kosovës e kanë ngritur jo vetëm prindërit e nxënësve por edhe deputetët.
Ndryshe, mjekët kanë alarmuar se një ndër shkaktarët kryesorë të lakimeve të boshtit kurrizor janë edhe çantat e rënda të shkollës, sidomos te fëmijët e vegjël.
Mjekët kanë thënë se mbi shpinën e një fëmijë 6-10 vjeç, pesha e çantës nuk duhet te kaloj 10% deri në 15% të peshës trupore. /tesheshi.com/
