Ministrat e qeverisë “Rama 2” që në ditët e para të punës së tyre nisen një aksion që lidhej më së shumti me pastrimin, dhe në këtë rresht u vendosën Turizmi, Infrastruktura dhe Energjia apo edhe Shëndetësia.
Duket se pas fazës së parë të paralajmërimit, tashmë masat do të kalojnë në një fazë tjetër, atë të ndjekjes penale, kjo të paktën vlen për ata që vendosin tabela të paautorizuara në akset rrugore që kthehen në risk për aksidente.
Kreu i Autoritetit Rrugor Shqiptar Afrim Qendro në një deklaratë për mediat bëri me dije se nëse do të ketë rivendosje të tyre personat përgjegjës do të ndiqen penalisht. Deklaratat u bënë gjatë mbikëqyrjes së situatës në segmentin Shkozet-Plepa ku ARRSH po bashkëpunon edhe me Inspektoratin Kombëtar i Mbrojtjes së Territorit, raporton Monitor.
“Po vazhdojmë aksionin për pastrimin e rrugëve kombëtare nga të gjitha tabelat, reklamat, mjetet informuese, kioskat dhe çka është shpallur që në fillim me planin e punës. Po mbarojmë aksin Tiranë-Durrës dhe Shkozet-Plepa. Dua tu bëj një thirrje të gjithë qytetarëve dhe gjitha bizneseve që të mos vendosin sërish këto që ne po i heqim ose të tjera. Nuk do të veprohet vetëm me heqje por do të ndiqen penalisht nëpërmjet denoncimit që do të bëjnë kompanitë e mirëmbajtjes që operojnë në të gjitha akset kombëtare”, paralajmëroi Qendro.
ARRSH dhe IKMT po vazhdojnë evidentimin e situatës në akset e tjera Tiranë-Hani i Hotit; Tiranë-Vlorë; Tiranë- Kapshticë, Levan-Kakavijë dhe Vlorë-Sarandë-Jorgucat. Në këto akse do të ndërhyhet në javët e ardhshme. /tesheshi.com/
