Kryetari i Akademisë së Shkencave dhe Arteve të Serbisë, Vladimir Kostiq, deklaroi ditë më parë se Kosova de fakto nuk është më e Serbisë dhe se këtë dikush duhet t`ia thoshte popullit. Dhe siç pritej, reagimet ndaj kësaj deklarate e ndaj tij personalisht, kanë qenë të shumta dhe fshikulluese deri në ekstrem.
Por Kostiq ka deklaruar nga ana e tij se nuk është i befasuar nga reagimet, për arsye se siç ka thënë ai, në Serbi ekziston një patriotizëm folklorik sundues.
Por ai ka shtuar se ajo që nuk e ka pritur, ka qenë përbaltja që i kanë bërë dhe në moral.
Kostiq ka theksuar se gjithë ajo çka ka ngjarë pas deklaratës së tij rreth Kosovës, flet për shkallën të ulët të komunikimit në të cilën ka arritur shoqëria në Serbi; pra ndërprerja e komunikimit në shkencë, kulturë, në jetën intelektuale e politike, pra në vetë elitën e vendit.
“Rasti i im duhet të merret si fillim i dialogut. Por askush në këtë dialog nuk duhet të guxojë të mendojë se është patriot më i madh se unë, këtë nuk e lejoj”, ka thënë Kostiq duke shtuar se është gati t`ju hiqte kapelën të gjithë atyre që dhanë jetën për Kosovën.
Deklarimet e Kostiqit u bënë gjatë një interviste për revistën beogradase Nedeljnik. /tesheshi.com/
