Thotë se ka ngitur zërin në vazhdimësi ndaj uzurpimit të hekurudhave të pjesës veriore nga Serbia dhe ka kërkuar që të kthehet qasja e hekurudhave të Kosovës në këtë pjesë, por deri tani pa rezultat.
Është ky Agron Thaçi, kryeshefi i hekurudhave të Kosovës, i cili tregon se ka zhvilluar takime me krerë të vendit dhe ka kërkuar prej tyre që të mos lejohet as hyrja e trenit serb me simbole kundër Kosovës.
Thaçi në një intervistë për tesheshi.com flet edhe për gjendjen aktuale të hekurudhave.
Intervistoi: Blendi Gashi
Si drejtor i hekurudhave të Kosovës, si i shihni paralajmërimet për hyrjen e trenit serb me simbole kundër Kosovës në territorin e vendit?
Institucioni që drejtoj e ka cilësuar të kundërligjshëm vazhdimin e hyrjes së trenave të Serbisë, ndërsa kam njoftuar institucionet përgjegjëse të Republikës për situatën e infrastrukturës hekurudhore në pjesën veriore.
A ka kompetenca institucioni juaj që ta ndalojë hyrjen e këtij treni nëse e tenton një gjë të tillë edhe në ditët në vazhdim?
Jo, pasi infrastruktura hekurudhore nuk e menaxhon pjesën veriore të linjave që nga viti 2008. Pra, nuk kemi qasje në atë pjesë, rrjedhimisht, as kompetenca.
A keni biseduar me krerët e shtetit për çështjen në fjalë?
Po, kam patur takime në Ministrinë e Infrastrukturës, me Autoritetin Rregullativ të Hekurudhave, si dhe kam komunikuar me Ministrinë e Jashtme, ku edhe kam kërkuar ndalimin e këtij treni.
Çështja e hekurudhave në veri a duhet shtruar në bisedimet e Brukselit?
Çështja e transportit hekurudhor dhe e transporti ajror përbëjnë dy tema që janë në radhë për t’u hapur për diskutim nga bartësit e dialogut për normalizimin e marrëdhënieve ndërmjet dy shteteve. Mirëpo, siç e dini, bisedimet kanë ngecur dhe hapja e çështjes është vonuar. Ndërsa në vitin 2015, autoritetet e hekurudhave të Kosovës kanë zhvilluar disa herë takime dialogu me ata të hekurudhave të Serbisë për zgjidhjen e çështjes së linjave hekurudhore në veri. Këto bisedime janë zhvilluar nëpërmjet odave ekonomike të dy shteteve, si dhe janë mbështetur nga zyrtarët e lartë të dy shteteve dhe të Brukselit. Këto takime kanë bërë që çështja e hekurudhave të vihet në agjendë të bisedimeve. Por nga atëherë, siç e thashë më lart, nuk ka patur progres.
Siç dihet, nga viti 2008, Serbia ka uzurpuar pjesën veriore të hekurudhave të Kosovës. A keni kërkuar nga autoritetet ndërkombëtare ta ktheni qasjen në këtë pjesë?
Që nga 3 marsi i vitit 2008, kur është uzurpuar pjesa veriore e hekurudhave, vazhdimisht institucioni që udhëheq i është drejtuar qeverisë, Bashkimit Evropian, KFOR-it, UNMIK-ut, dhe të gjitha institucioneve të tjera relevante, që janë njoftuar dhe u është kërkuar dëbimi i hekurudhave të Serbisë nga ajo pjesë.
Në fund, një pyetje e përgjithshme. Si është gjendja në infrastrukturën hekurudhore në vend? A pritet të ketë ndonjë investim sivjet?
Janë bërë përgatitjet dhe hartimi i dokumentacionit teknik për fillimin e rehabilitimit të linjës 10 hekurudhore, segmentit Hani Elezit – Fushë Kosovë. Punimet në këtë segment do të fillojnë këtë vit. Në vitin që vjen pritet të punohet në segmentin e dytë, Fushë Kosovë – Mitrovicë, ndërsa në vazhdim në segmentin e tretë, Mitrovicë – Leshak- Kufi me Serbi. Mjetet financiare janë të siguruara, dhe po punohet çdo ditë në përgatitjen e implementimit të tyre. /tesheshi.com/
