“Pavarësisht së është bashkëkryesues i Grupit për mbështetje të Sirisë, Rusia ka shkelur armëpushimin në këtë vend më shumë se çdo vend tjetër”, ka thënë ministri i jashtëm turk, Mevlut Çavushoglu.
Vërejtjet e ministrit erdhën gjatë një konference të përbashkët shtypi pas një takimi trepalësh me homologët e tij polak dhe rumun, të mbajtur në Varshavë.
“Është e kuptueshme se edhe përkundër faktit se është bashkëkryesues i Grupit Ndërkombëtar për Mbështetje të Sirisë, Rusia ka shkelur armëpushimin në Siri më shumë se çdo vend tjetër,” ka thënë Çavushoglu, dhe ka shtuar se Rusia ka dështuar në përpjekjet e saj për të luftuar DAESH-in, duke shënjestruar civilët dhe grupet e moderuara opozitare.
“Ajo (Rusia) vazhdon të shënjestrojë shkollat, spitalet dhe civilët, jo DAESH-in. Ky është problemi i vërtetë”, ka thënë Cavusoglu.
“Qëllimi është që të mbahen regjimet shtypëse atje dhe të forcohet prezenca së tyre”, ka shtuar ai.
Ministri turk po ashtu nënvizoi nevojën e gjetjes së një definicioni të përbashkët të terrorizmit dhe kërkoi që të ndërpritet praktika e klasifikimit të terroristëve në të mirë dhe në të këqinj, në mënyrë që të konfrontohen të gjitha llojet e terrorizmit, pavarësisht prej nga vijnë dhe kë kanë synim të sulmeve të tyre.
Përkundër nënshkrimit të armëpushimit në muajin prill, forcat e regjimit sirian dhe avionët rusë kanë intensifikuar sulmet kundër pozicioneve të mbajtura nga opozita, duke vrarë civilë të pafajshëm.
Në sulmet e fundit ajrore të mërkurën, janë vrarë dy fëmijë në Sirinë veriore, thonë burimet lokale.
Avionë luftarakë po ashtu kanë sulmuar fshatra afër Aleppos me bomba fosfori, duke lënë me dhjetra të plagosur.
Sipas Qendrës Siriane për Hulumtime të politikave, vlerësohet se 470,000 sirianë janë vrarë në konfliktin pesëvjeçar në Siri. /tesheshi.com/
