Kreu i diplomacisë italiane, Angelino Alfano, e konsideroi situatën në rajon si tejet të brishtë dhe në rrezik. Gjatë një vizite në Tiranë, ku ai foli në një konferencë për shtyp me homologun Bushati, Alfano ai tha se BE duhet të impenjohet më fort në Ballkan.
“Ballkani Perëndimor është një zonë që ka rëndësi strategjike për të gjithë Europën. Pavarësisht arritjeve të konsiderueshme në kuadër të procesit të integrimit, risqet për destabilizim në rajon po rriten, duke vënë në pikëpyetje edhe rezultatet pozitive të arritura deri tani. Jemi duke asistuar në një shfaqje progesive të tensioneve mes vendeve të rajonit dhe kjo rritje e tensioneve është e shoqëruar me rritje të përdorimit të retorikës nacionaliste nga ana e disa liderëve politikë në rajon. Pikërisht për shkak të kësaj situate, BE-ja duhet të riafirmojë rolin e vet si partner kryesor në të gjithë këtë rajon dhe të dërgojë një mesazh të fortë konkret impenjimi në të gjithë Ballkanin Perëndimor”, theksoi ministr i Jashtëm italian.
Ndërsa sa i përket situatës së brendshme politike, asaj ku në qendër është opozita me një protestë të pazakontë e që ka bllokuar ligjin e shumëpërfolur të Vetingut, Alfano tha se nuk donte të hynte në cështjet e politikës së brendshme, por u tregua diplomatik në mbështetje të qeverisë duke theksuar se “Italia mbështet procesin e reformave që korrespondon me 5 pikat, të konsideruara pika kyçe nga Këshilli Evropian në samitin e vitit 2015”. /tesheshi.com/
