Takimet e eurokomisionerit Johanes Hahn me përfaqësuesit e partive politike në Maqedoni, filluan nga Lëvizja BESA.
Pas këtij takimi kreu i BESËS, Bilall Kasami ka thënë se është biseduar me Hahn dhe eurodeputetët për hapat që duhet të ndërmerren me qëllim daljen e vendit nga kriza. Sipas tij, është mirë që ndërkombëtarët janë në Shkup, me qëllim që të ndihmojnë në tejkalimin e krizës politike.
“Në këtë drejtim janë edhe aktivitetet e BESËS, pa shikuar interesat partiake ne shikojmë se si të dalim nga kjo krizë. Ne vlerësojmë se ka faktorë që dëshirojnë që këtë krizë institucionale ta thellojnë dhe ta shndërrojnë në krizë intraetnike. Përkrahja e eurodeputetëve është e një rëndësi të veçantë”, ka thënë Kasami.
Në fund Kasami theksoi se nuk ka Platformë Shqiptare, ashtu siç e quan VMRO-DPMNE-ja, por vetëm një deklaratë e faktorit politik shqiptar në lidhje me kërkesat e shqiptarëve.
