I ftuar në emisionin Intervista të televizionit Shenja, para pak çastesh kryetari i Lëvizjes BESA, Bilall Kasami ka folur për dorëheqjet e ministrave të BDI-së nga qeveria. Sipas tij, kjo nuk është asgjë më tepër, përveç se një hap që e bën partneri i tyre në koalicion VMRO-DPMNE duke shfrytëzuar BDI-në, për të bërë presion mbi faktorin si të brendshëm por edhe ndërkombëtarë mbi datën e zgjedhjeve.
“Në këtë drejtim VMRO-DPMNE ka dy opsione, të ketë zgjedhje më 5 qershor ose të rikthehet qeveria politike me në krye Nikolla Gruevski dhe të mbahen zgjedhje të rregullta kur janë paraparë”, tha Kasami.
Ai ka shtuar se me këtë, BDI po luan rolin që i jep mundësi VMRO-DPMNE-së që në zgjedhje modoemos të shkohet më 5 qershor.
“Shqiptarët edhe njëherë po tradhtohen nga partia të cilës ja dhanë votën që t’i përfaqëson ata. Edhe më tej kjo parti po del që është e kapur nga parteri i saj i koalicionit. Në vend që të përfaqësoj shqiptarët, në orientimin e tyre euroatlantik ajo edhe më tutje po tregon se është në krahun e atyre që janë kundër interesave të parterëve tanë strategjik siç janë SHBA dhe BE. Mund të them se BDI edhe më tutje e luan lojën antiamerikane të Nikolla Gruevskit”, ka shtuar Kasami.
Rikujtojmë se sot ministrat e BDI-së edhe zyrtarisht kanë dorëzuar dorëheqjet e tyre deri tek kryeministri i përkohshëm i Maqedonisë, Emill Dimitriev.
M.Krasniqi – /tesheshi.com/
