I ndodhur për një vizitë në Durrës, kreu gjysëm hollandez i bashkisë së Roterdamit, Ahmed Aboutaleb e përcolli përgjegjësinë dhe tek Brukseli, në lidhje me ikjen masive të shqiptarëve.
“Në rrugën për të hyrë në BE, Shqipëria duhet të përmbushë disa standarde të kërkuara dhe nuk ka diskutim për këtë. Ndaj zbatimi i ligjit, lufta kundër korrupsionit dhe të drejtat e njeriut duhet të zenë vend në kërkesat, po nëse bëhet analizë pse shqiptarët duan të largohen nga ky vend, padyshim që ka të bëjë me çështjet sociale-ekonomike dhe situatën në vend. E vetmja mundësi që të parandalosh largimin në vendet e tjera është t’u krijosh atyre mundësi në vendin e tyre. Përveç përgjegjësisë së qeverisë shqiptare, duhet mbështetje dhe nga Brukseli që nuk duhet të thotë vetëm Stop!, po duhet të punojnë bashkë”, u shpreh Aboutaleb, cituar nga TCH.
E nga ana tjetër, ai ka kërkuar që krimi shqiptar në Hollandë të goditet dhe më fort, deri në konfiskim pasurish, por dhe tha se nuk ndante mendimin që të gjithë shqiptarët e atjeshëm ishin kriminelë.
“Çështjet e krimit në Roterdam vijnë nga e gjithë bota dhe jo të gjithë shqiptarët janë kriminelë. Por ka shqiptarë që janë kriminelë dhe të përfshirë në trafikun e drogës, armëve dhe krimit të organizuar. Kemi ardhur të flasim për të parë mundësitë e bashkëpunimit dhe të radikalizojmë veprimet ndaj kriminelëve. Kur ne i kapim këta kriminelë në Holandë të konfiskojmë në bashkëpunim me ju dhe asetet e tyre në Shqipëri duke e bërë këtë luftë efikase”, tha Aboutaleb, gjatë një vizite në portin e Durrësit dhe në policinë kufitare të atyshme. /tesheshi.com/
