Krerët shtetërorë në Maqedoni kanë mbajtur takim koordinues ku është shqyrtim propozimet konkrete të ndërmjetësit të OKB-së, Metju Nimiç për zgjidhjen e çështjes së “emrit” mes Maqedonisë dhe Greqisë dhe konkluzionet nga takimi me kryeministrin grek Aleksis Cipras në Davos të Zvicrës.
Në takim morrën pjesë presidenti Gjorge Ivanov; kryeministri Zoran Zaev; ministri i Punëve të Jashtme, Nikolla Dimitrov; kryetari i VMRO-së; Hristijan Mickoski dhe kryetari i BDI-së, Ali Ahmeti.
Kryeministri Zaev shprehet optimist se mund të gjendet konsensus nacional lidhur me këtë çështje, dhe se ky proces kërkon pwrfshirjen dhe përgjegjësinë e domosdoshme tw të gjithëve.
“Ky proces kërkon përgjegjësi politike me qëllim të ndërtimit të konsensusit nacional në Republikën e Maqedonisë. Me zgjidhjen e kontestit bilateral që zgjat 25 vjet kemi për qëllim që të sigurojmë përparim në rrugën tonë drejtë integrimit në NATO dhe BE”, deklaroi Zoran Zaev, kryeministër.
Pas përfundimit të takimit, kreu i BDI-së Ali Ahmeti tha se ky është fillimi i fundit i një procesi shumë të rëndësishëm. Sipas Ahmetit Maqedonia e ka vendin në BE dhe NATO e kjo duhet të ndodh sa më parë.
“Është shumë e rëndësishme që vendi ynë të jetë pjesë e NATO-s dhe e Bashkimit Evropian, të ketë paqe dhe stabilitet të qëndrueshëm”– deklaroi Ahmeti.
Ndërsa presidenti Gjorgje Ivanov tha se institucionet shtetërore do të mbajnë qëndrim në dobi të interesave të qytetarëve dhe të vendit dhe se ishte takim informativ ku kryeministri dhe kryediplomati folën për idetë qëndrimet e dy palëve rreth çështjes së “emrit”.
“U informuam për detajet për takimin. Në të ardhmen, këto detaje do të na ndihmojnë për të ngritur qëndrimet tona”, tha Ivanov.
Gjithashtu edhe kryeministri grek Aleksis Cipras, zhvilloi takime koordinuese për të arritur konsensus nacional për “emrin”.
Ndërmjetësi Nimiç, javën e ardhshme do të qëndrojë në Shkup dhe Athinë për të kuptuar qëndrimet e dy palëve për propozimet e ofruara në raundin e fundit të negociatave në Nju Jork. /tesheshi.com/
