Nga Bashkim Kastrati
Edhe përkundër faktit se Kosova ka nevojë për eksportimin e produkteve të ndryshme jashtë vendit dhe bashkëpunim me bizneset jashtë vendit, zyrtarët e lartë të vendit që nga kryeministri, zv.kryeminstrat dhe ministrat nuk e shohin të arsyeshme që t’i marrin biznesmenët e Kosovës në vizita zyrtare jashtë vendit.
Disa biznesmenë të huaj kanë thënë në paraqitje televizive dhe në tryeza të ndryshme se krerët e shteteve të zhvilluara gjatë vizitave të tyre zyrtare e që kanë karakter edhe ekonomik, zakonisht marrin me vete edhe biznesmenë.
Por këtë gjë nuk po e praktikojnë krerët e lartë të qeverisë së Kosovës. Para disa javësh, kryeministri Isa Mustafa ka realizuar një vizitë në Gjermani. Ai në këtë vizitë ishte i shoqëruar vetëm nga ministrat: Blerand Stavileci, ministër i Zhvillimit Ekonomik, Hykmete Bajrami ministre e Tregtisë dhe Industrisë dhe Arban Abrashi, ministër i Punës dhe Mirëqenies Sociale.
Kryeministri dhe delegacioni qeveritar i Kosovës u kanë bërë thirrje bizneseve gjermane që të vijnë për të investuar në Kosovë. Gjithashtu ata kanë zhvilluar takime të përbashkëta me dhjetëra biznese të rëndësishme gjermane si dhe kanë vizituar gjigantët gjermanë Mercedes, BMW, MAN dhe kompani të tjera gjermane.
Pra e gjithë kjo vizitë kishte karakter ekonomik dhe këta zyrtarë nuk e kanë parë të arsyeshme që të marrin me vete edhe biznesmenë të Kosovës, të cilët do të kishin mundësi që të takohen dhe të bisedojnë me biznesmenë nga Gjermania dhe të diskutojnë për mënyrat e bashkëpunimit.
Përfshirja e komunitetit të biznesit në delegacionet qeveritare i domosdoshëm
Profesori i ekonomisë, Naim Gashi ka thënë për tesheshi.com se nuk është më asnjë sekret që diplomacia ndërkombëtare në kohët moderne dominohet nga përfaqësimi dhe mbrojtja e interesave të bizneseve. Sipas tij, është shumë e zakontë që me përfaqësues politikë udhëtojnë jashtë vendit edhe përfaqësues të komunitetit të biznesit dhe përfaqësues të bizneseve të njohura.
“Kosova është një vend i ri me një diplomaci në krijim e sipër, e dominuar thellësisht nga nepotizmi dhe joprofesionalizmi. Një pjesë dërmuese e përfaqësuesve diplomatikë të Kosovës, jo të gjithë, janë komprometues për Kosovën dhe komunitetin e biznesit”, thotë Gashi.
Ai thotë se ngjashëm me korin diplomatik, edhe komuniteti i biznesit në Kosovë përfaqësohet nga njerëz jokompetent për punën që ata bëjnë dhe në këtë mënyrë nuk merren seriozisht as brenda Kosovës dhe as jashtë saj.
Sipas tij, diplomacia kosovare dominohet nga lobimi për njohje të reja dhe përpjekjet për anëtarësim në organizata ndërkombëtare dhe në këtë mënyrë lobimi për mbrojtjen dhe përfaqësimin e interesave të ekonomisë dhe biznesit, është shumë minor, të mos themi i papërfillshëm.
“Puna e parë që duhet bërë, është që komuniteti i biznesit në Kosovë të zgjedh përfaqësues kompetent, të cilët merren seriozisht pikë së pari nga qytetarët dhe institucionet dhe më pas duhet të shikohet mundësia që ata të përfaqësojnë interesat e biznesit edhe jashtë shtetit. Fatkeqësisht edhe biznesi nuk po bën përjashtim nga institucionet tjera të ndikuara deri në palcë nga politika, prandaj kemi edhe këtë përfaqësim kaq të papërgjegjshëm të tyre brenda dhe jashtë vendit”, theksoi profesori Gashi.
Politikanët tanë kanë mungesë të vizionit ekonomik
Lulzim Beqiri, magjistër i ekonomisë, ka thënë për tesheshi.com se në vizitat me karakter ekonomik dhe të bashkëpunimit në mes vendeve udhëheqësit kosovarë duhet të marrin me vete bizneset e dëshmuara në Kosovë.
“Mos të harrojmë arka e shtetit mbushet nga këta biznesmenë të suksesshëm. Bizneset në Kosovë nuk janë vetëm për të paguar tatim, ato duhet që denjësisht të përfaqësohen edhe në arenën ndërkombëtare në mënyrë që të shkëmbejnë provoja dhe të lidhin marrëveshje bilaterale me partneret e mundshëm”, thotë Beqiri.
Ai thotë se rrallë herë kemi hasur që qeveritarët kosovarë kanë marrë ndonjë turne vizitash në vendet e rajonit me biznesmenët kosovarë jo që nuk ka biznesmenë të shquar dhe vizionarë Kosova, por se ka mungesë vizionesh të politikanet tanë.
“Shumica e vendeve të zhvilluara vizitat me karakter ekonomik kanë me vete biznesmenë të vendit të tyre, Presidenti Turk Erdogan në çdo vizitë me karakter ekonomik bashkudhëton me një numër rekord biznesmenësh dhe ata biznesmenë kanë mbështetjen e duhur nga qeveria turke, gjithashtu edhe lider nga lindja e mesme zakonisht marrin biznesmenë në udhëtimet e tyre zyrtare”, u shpreh Beqiri, duke shtuar se edhe burrështetas të vendeve të BE-së e praktikojnë një metodë të tillë dhe se biznesmenët kanë më shumë siguri dhe ndihen më të sigurt që të lidhin ndonjë bashkëpunim në prani të udhëheqësve të tyre.
Ai thotë se Kosova ka biznesmenë mjaft të suksesshëm që ua ka zili edhe rajoni, andaj qeveritarët e Kosovës duhet që të shoqërohen me biznesmenë vendorë në vizitat me karakter ekonomik dhe të bashkëpunimit ekonomik. /tesheshi.com/
