Të dhjetë krerët e komunave serbe në Kosovë i kanë dërguar një letër të hapur presidentit serb, Aleksandar Vuçiç, me kërkesën që të mos heq dorë nga lufta për zgjidhje të drejtë, kompromisi dhe të qëndrueshme për Kosovën sepse, sipas tyre, heqja dorë nga kjo do të ishte humbja më e madhe e popullit serb në historinë e re dhe njëkohësisht fitorja më e madhe e armiqve dhe kundërshtarëve të tij të brendshëm.
Ata porosisin presidentin serb se “lufta e tij ua ka ngjallur shpresën se, pas shumë vitesh, nuk janë vetëm, se serbët në veri nuk kanë mbrojtur më kot çdo pëllëmbë toke nga ekstremistët, dhe se serbët në jug nuk mbijetuan më kot guximshëm në këtë rajon”.
“Me këtë letër dëshirojmë të ju porosisim se jemi të vetëdijshëm për barrën që bartni, dhe se nga një situatë e pamundshme po provoni të nxirrni më të mirën, për këtë arsye ju sigurojmë se do të mbështesim çdo zgjidhje që do të arrini, e cila do të nënkuptonte më shumë të drejta për serbët, ambient më të sigurt për qytetarët dhe për ruajtje të vendeve tona të shenjta dhe që do të mundësonte pozitë më të mirë ekonomike për popullin tonë, qoftë ajo edhe demarkacioni, korrigjimi apo diçka e tretë”.
Në letër i bëhet apel presidentit serb që të mos heq dorë nga misioni i “shpëtimit të veriut të Kosovës dhe Metohisë dhe krejt çka mund të shpëtohet nga kthetrat e Prishtinës”, të cilën, siç shtohet në letër, e propozojnë Jeremiqi, Gjilasi, Janjiqi, Trajkoviqi dhe militantë tjerë dhe ambasadat e huaja.
“Ngazëllimi i tyre ndaj fatit tonë të rëndë vetëm se duhet të nxis juve t’i vazhdoni negociatat, për çka do ta keni gjithmonë mbështetjen tonë dhe të popullit serb të parezervë. Por, nëse deri te zgjidhja nuk vjen si pasojë e efektit dëmtues të të sipërpërmendurve, ne do të detyrohemi t’ju shkojmë nëpër shtëpi e vila e t’i pyesim se përse ia bënë këtë popullit serb”, thuhet në letër.
Letrën e kanë nënshkruar: kryetari i Komunës së veriut të Mitrovicës, Goran Rakiç, ai i Zubin Potokut, Stevan Vuloviç, i Zveçanit Vuçin Jankoviç, i Leposaviqit Zoran Todiç, i Graçanicës Srxhan Popoviç, i Shtërpcës Bratislav Nikoliç, i Ranillugut Vladica Aritonoviç, i Novobërdës Svetislav Ivanoviç, i Kllokotit Bozhidar Dejanoviç dhe kryetari i Komunës së Parteshit, Dragan Petkoviç. /tesheshi.com/
