Femra që rebelohen kundër dhunës dhe mundohen të gjejnë një zgjidhje në jetën e tyre. Është shpresa e të nisurit nga e para, e cila bën bashkë të gjitha femrat në Indi, të cilat janë shpërfytyruar nga acidi. Ato punojnë në Cafe Sheroses’ Hangout, në Agra, në veri të Indisë.
Lokali përbëhet nga një kafeteri, një bibliotekë, një radio dhe një dyqan i vogël ku të rejat me emrin Rupa shesin veshje të krijuara prej tyre. Ky projekt është krijuar nga një iniciativë e njohur me emrin Stop Acid Attak, një shoqëri e krijuar në New Delhi në vitin 2013, e cila mbron viktimat e sulmeve me acid. Qëllimi është të krijojë sërish besimin e grave në veten e tyre, për të mos u turpëruar nga pamja dhe për të treguar në publik punën e tyre e fytyrën.
Siç raporton thepostinternazionale.it, lokali është një mundësi shumë e mirë e integrimit në shoqëri për femrat dhe u garanton atyre pavarësinë ekonomike. 20-vjeçarja Ritu Saini, e cila punon në lokal është djegur me acid nga një prej kushërinjve të saj.
Ajo i është nënshtruar disa ndërhyrjeve kirurgjikale dhe ka humbur syrin e majtë. “Përpara se të nisja punën këtu, e mbaja gjithmonë të mbuluar fytyrën”,- thotë ajo për The Wall Street Journal. Tani Ritu lëviz nëpër qytet me fytyrën të zbuluar dhe është një shembull për tu ndjekur edhe nga femrat e tjera që kanë qenë viktima të sulmeve me acid dhe që kanë problem të tregojnë pamjen e tyre në publik.
Cafe Sheroses’ Hangout, përfaqëson ndër të tjera edhe një mundësi për të vijuar fushatën e iniciuar nga Stop Acid Attacks dhe për të sensibilizuar sa më shumë njerëz në lidhje me këtë problematikë./tesheshi.com/
