Deputeti demokrat Dashnor Sula, në një prirje të lexueshme për të bërë protagonistin politik, pak pasi u shfaq në oborrin e Kuvendit me një shporte më ushqime, të cilat sipas tij nuk mund të blihen nga populli i thjeshtë, tha se në Parlamentin shqiptar vjen era puro, madje edhe hashash.
“Në këtë Kuvend vjen era puro, për të mos thënë se vjen dhe era hashash. Ky është realiteti zonja kryetare.
Unë nuk e kam për turp dhe jam krenar që jam fshatar, dhe që përfaqësoj gjithë ata fshatarët e bujqit.
Dilni e shikoni njëherë nëpër fshatra, është gjendja katastrofike. Babai im 78 vjeç punon vetë, se nuk gjen punëtorë. Sikur 10% e parave të pista që investohen në Shqipëri të përdoreshin për punë të mira, do mbanim Ballkanin me bukë. Neve të opozitës domatet na kanë ngelur, por qeverisë i ka ngelur kokaina. Mos m’i bëjë duart ashtu Pando (Majko) se u kap me 20 kg Kajmaku. Ngrini zërin, vini fre qeverisë”, tha Sula, duke provokuar reagimin e Majkos.
“Ne kemi shumë dëshirë t’i biem edhe vetes. Harrojmë që brenda politikës jemi edhe ne. Këtu u tha që para duhanit pihet edhe hashash. Ta trajtosh këtë sikur po ju hapet zemra dhe stomaku për fshatarët kjo është gjë e gabuar.
Duke dashur të bëhemi të ndjeshëm nxirrni anën e kundërt. Ju jeni përfaqësues të opozitës dhe opozita në thelb tenton të përfaqësojë moralin e shoqërisë. Para se të kërkoni nga maxhoranca duhet të ktheni pak kokën edhe nga vetja”, tha deputeti socialist. /teshesh.com/
