Deklarimeve të djeshme të ca zyrtarëve amerikanë e britanikë se avioni rus që fluturonte në hapësirën egjiptiane mund të jetë rrëzuar nga një bombë u ka dhënë përgjigje zëdhënësi i Kremlinit, Dmitry Peskov.
Ai e ka quajtur spekulim çdo deklarim mbi shkakun e rrëzimit të avionit të pasagjerëve në Gadishullin e Sinait.
“Një lloj versioni mbi atë që ngjau dhe mbi arsyet mund të jepet vetëm nga hetimi, dhe ne nuk kemi dëgjuar ende ndonjë deklarim prej hetimit,” u tha zëdhënësi gazetarëve.
“Çdo shpjegim tjetër i propozuar ngjan si informacion i paverifikuar apo si një lloj spekulimi,” ka shtuar Peskov.
Që prej rrëzimit të avionit të një kompanie ruse të shtunën në Egjipt nuk kanë munguar hamendësimet mbi rrëzimin e tij. Në përpjekje për të mos dëmtuar turizmin, autoritetet egjiptiane e kanë mohuar mundësinë e një akti terrorist, dhe i kanë hedhur poshtë pretendimet e ISIS-it se janë luftëtarët e tij që e rrëzuan avionin.
Ndërkohë që dje autoritete amerikane dhe britanike i mëshuan variantit të rrëzimit për shkak të një bombe. /tesheshi.com/
