Vrasja e ambasadorit rus në Ankara në fillim të kësaj jave është ende në qendër të vëmendjes, shoqëruar vijimësisht me deklarata nga palët e përfshira drejtpërdrejt.
Zëdhënësi i Kremlinit, Dmitry Peskov, ka dhënë një intervistë për një kanal televiziv, Mir TV Channel, ku e ka cilësuar vrasjen e dipolomatit rus si një thikë pas shpine për Turqinë.
“Pala turke nuk donte që të ndodhte ky incident. Kjo është arsyeja pse ky sulm ishte një thikë pas shpine për Turqinë,” raporton Yeni Şafak të ketë thënë Peskov.
Ai nuk ka pranuar ta quajë rastësi kohën e atentatit, duke nënvizuar, “Ky ishte një rast unik në historinë e marrëdhënieve turko-ruse.”
Ndërkaq, presidenti turk, Recep Tayyip Erdoğan, i ka mëshuar rishtas përkatësisë së vrasësit së ambasadorit si një pjesëtar i FETÖ-s, organizatës terroriste gyleniste.
Në konferencën e përbashkët për shtyp me presidentin e Shqipërisë, Bujar Nishani, Erdoğan-i ka thënë mes të tjerash: “Vrasësi i ambasadorit rus është qartas një anëtar i FETÖ-s. Nuk është e nevojshme të fshihet kjo. Këtë e zbulojnë të gjitha lidhjet, ku ai u rrit.”
Ministri i Jashtëm turk, Mevlüt Çavuşoğlu, po ashtu, në një bisedë telefonike një ditë më parë me sekretarin amerikan të Shtetit, John Kerry, bëri të ditur se Turqia dhe Rusia ishin të vetëdijshme për përfshirjen e Gülen-it në vrasjen e ambasadorit. /tesheshi.com/
