Sot nisi më në fund evakuimi i civilëve nga pjesa lindore e Halepit, me arritjen e një marrëveshje të re për armëpushim mes forcave ndërluftuese.
Sipas Kremlinit, ky evakuim është i lidhur drejtpërdrejt me bisedat e vazhdueshme midis presidentit turk Rexhep Tajjip Erdogan dhe homologut të tij rus, Vladimir Putin. Kjo është ajo çka deklaroi sot zëdhënësi i Putinit.
Të martën në mbrëmje, forcat e regjimit të Esadit dhe grupet opozitare arritën një marrëveshje armëpushimi të ndërmjetësuar nga Turqia dhe Rusia, për t’i hapur rrugën evakuimit të civilëve nga pjesa lindore e Halepit. Marrëveshje e cila dështoi të konkretizohej dje, duke u lënë vendin sërish bombardimeve.
Erdogan dhe Putin biseduan një ditë më parë në telefon mbi situatën në Halep, raporton Daily Sabah.
Të dy udhëheqësit qenë të një mendjeje se marrëveshja e pjesshme e armëpushimit duhet të zbatohet plotësisht dhe nuk duhet shkelur.
Autokolona e parë e evakuimit, me të sëmurë dhe të plagosur, u nis nga pjesa lindore e qytetit të enjten në mëngjes, por ajo u sulmua nga grupet paraushtarake të mbështetur nga Irani, si dhe nga forcat e regjimit. Sipas raportimeve lokale, katër persona u vranë dhe disa të tjerë u plagosën.
Pasi shkeljes së armëpushimit, ministri i Jashtëm turk, Mevlyt Çavushoglu ka biseduar dy herë në telefon me homologun e tij iranian, Xhevad Zarif.
Ndërkaq, evakuimi vazhdon sipas Al Jazeera-s. Rrjeti mediatik flet për më së paku një mijë civilë të evakuuar me 53 mjete transporti. /tesheshi.com/
