Negociatorët europianë mbërritën në Athinë për të nisur diskutimet për paketën e tretë të ndihmës për Greqinë, hera e parë kjo që kur partia e radikalëve të majtë, Syriza erdhi në pushtet.
Negociatat e para të zyrtarëve të Qeverisë Cipras me përfaqësuesit e kreditorëve reflektojnë marrëveshjen e vështirë të Brukselit, kur Athina mori sërish përsipër reforma të ashpra për të mos falimentuar.
Nuk është e qartë nëse dhe kur do të bashkohen me kreditorët, përfaqësuesit e FMN-së për të diskutuar paketën prej 86 miliardë eurosh.
FMN kërkon që barra e borxhit grek të reduktohet deri në nivelin e konsideruar “i qëndrueshëm”, por ka ndeshur në rezistencën e partnerëve europianë.
Bisedimet për paketën e shpëtimit pritet të zgjasin një muaj, ndërsa kontrolli i rreptë i kapitaleve që nisi në fund të qershorit mbetet në fuqi për të parandaluar falimentimin e bankave greke. /tesheshi/
