Përgjimet e dosjes Ndragheta do jenë fokusi i hetimeve të SPAK. Për këtë arsye, kreu i këtij institucioni Arben Kraja, ka shkuar në Itali ku ka zhvilluar një takim me kryeprokurorin e Antimafias, Cafiero de Raho.
Eshtë pikërisht SPAK që bën me dije zyrtarisht se “në kuadër të sqarimit të rrethanave dhe fakteve që lidhen me objektin e hetimeve të këtij procedimi penal, sot me datë 04.02.2021 në selinë e Drejtorisë Kombëtare Antimafia dhe Antiterrorizëm në Romë, u zhvillua një takim koordinativ”.
“Takimi u realizua nën drejtimin e zotit Federico Cafiero de Raho, Drejtues i Prokurorisë Kombëtare Antimafia dhe Antiterrorizëm, Itali dhe zotit Arben Kraja, Drejtues i Prokurorisë së Posaçme, Shqipëri, me pjesëmarrjen dhe të prokurorëve italianë dhe shqiptarë që hetojnë këto dy procedime penale në shtetet respektive.
Prokuroria e Posaçme kundër Korrupsionit dhe Krimit të Organizuar garanton publikun se është e vendosur për të hetuar deri në fund çdo element dhe fakt që përbën indicie për veprimtari kriminale të kryer në territorin e Republikës së Shqipërisë dhe që lidhet me objektin e hetimeve të kryera deri tani nga Prokuroria Antimafia e Catanzaros”, thuhet në njoftimin e SPAK.
Kujtojmë se ky zhvillim u paralajmërua ditë më parë dhe nga ambasadori italian në Shqipëri.
Aludohet se përgjimet implikojnë struktura të larta shtetërore dhe të politike, deri te Presidenti, por që këto pritet të sqarohen nga SPAK, nëse janë reale dhe në ç’nivel janë. /tesheshi.com/
