Shefja e delegacionit amerikan në Kombet e Bashkuara, ambasadorja Linda Thomas-Greenfield, krahasoi Presidentin rus Vladimir Putin me ish-udhëheqësin e BRSS, Joseph Stalin. Ky i fundit organizoi Holodomor-in në Ukrainë, duke vrarë miliona civilë, gjë që sillet tashmë në kujtesë me pushtimin e Ukrainës nga Putini.
“Ky muaj është 90-vjetori i Holodomor-it, që do të thotë vdekje nga uria”, tha Thomas-Greenfield të martën gjatë një fjalimi në një takim të Këshillit të Sigurisë Kombëtare të Shtëpisë së Bardhë.
Ajo theksoi se në atë kohë, miliona gra, fëmijë dhe burra ukrainas vdiqën për shkak të politikave të ashpra dhe represive të regjimit stalinist, si rezultat i një zie buke të shkaktuar artificialisht.
Ky “u bë një paralajmërim” se çfarë mund të ndodhë nëse brutaliteti dhe tirania nuk frenohen.
“Por Putini nuk e kishte problem, ai ishte i frymëzuar. Ashtu si Stalini, Putini përdor ushqimin si një armë lufte. Ashtu si Stalini, Putini shkaktoi urinë dhe vdekjen në Ukrainë”, theksoi Thomas-Greenfield.
Sipas saj, Rusia po bën një luftë jo vetëm kundër popullit të Ukrainës, “ajo po bën gjithashtu një luftë kundër popullsive të cenueshme në mbarë botën që varen nga eksportet e ushqimit nga Ukraina”.
Ajo kujtoi se Rusia ka përkeqësuar sigurinë ushqimore globale, duke theksuar se para pushtimit të plotë rus, Ukraina ishte një nga prodhuesit dhe eksportuesit kryesorë të produkteve bujqësore dhe se prodhimi i grurit në vend u reduktua me 35 për qind në krahasim me periudhën e para luftës.
“Pse? Sepse Rusia po vjedh grurin ukrainas, po saboton tokën bujqësore, po bombardon infrastrukturën bujqësore dhe qytetet portuale të Ukrainës”, tha Thomas-Greenfield.
Siç tha ajo, pavarësisht sulmeve ruse, populli ukrainas ngulmoi dhe vazhdon të jetë një “fener shprese” për njerëzit më të cenueshëm në botë.
Deklarimet e tij, për cinizëm, vijnë në kohën që SHBA po akuzohet se po mbështet Izraelin në një krim shumë të rëndë, gati një genocidi, siç janë sulmet mizore të ushtrisë së shtetit hebre ndaj popullatës civile në Gaza, me një bilanc të pabesueshëm vdekjesh në gra e fëmijë në pak javë. /tesheshi.com/
