Me votën kundër të kryetarit Zguri, KQZ shpalli rezultatin zyrtar të 30 Qershorit, afro një muaj pas procesit të votimit, duke u shoqëruar me dyshimet dhe akuzat për rritje fiktive të numrit të pjesëmarrësve.
Klement Zguri, njeriu i opozitës që e drejton këtë institucion dhuruar asaj nga Rama pas marrëveshjes me Bashën dy vite më parë, tha se kishte arsye për ta dhënë votën kundër, referuar jo aspekteve ligjore por atyre politike
“Zgjedhjet nuk janë vetëm një moment ligjor por edhe një ngjarje politike. Brenda zgjedhjeve përfshihen të gjithë zhvillimet. Është një formalitet pasi vendimi i sotëm është shoqëruar paraprakisht me një sërë aktesh të tjera. Këto zgjedhje janë shoqëruar nga një konflikt i madh politik. Besoj se konflikti do të vazhdojë edhe pas. Por ky nuk është problemi im. Problemi im është se me votën kjo merr një rëndësi tjetër. Vota nuk kthehet thjesht formale. Problemi im është se përmes votës sonë kemi dhënë edhe një notë për sjelljen e KQZ. KQZ në këtë proces zgjedhor ndërmjet standardit ligjor dhe arbitraritetit, për fat të keq ka zgjedhur të dytën. E kam të pamundur të jap një notë kaluese. Unë do të votoj kundër sepse unë dua që kjo përformancë të mos kthehet në standard pune në të ardhmen. Unë nuk bij dakord me shumicën dhe shpresoj që kolegët e mi t’i thërrasin vetëdijes ligjore”, tha Zguri.
Por nga ana tjetër, n/kryetari Denar Biba, tha se KQZ arriti të rezistojë ndaj një stuhie politike, e për këtë pati dhe mbështetje ndërkombëtare.
“Shqipëria zgjodhi mes Kushtetutës dhe pazareve. Kushtetuta iu mbivendos pazareve të vogla. Në këto zgjedhje ndoshta më shumë se asnjëherë tjetër edhe personalisht kam ndjerë mbështetjen e partnerëve perëndimorë që e mbështetën Shqipërisë në këtë rrugëtim ku kryesorja është ndërtimi i shtetit”, tha Biba. /tesheshi.com/
