Komisioni Qendror i Zgjedhjeve pritet të shqyrtojë në mbledhjen e sotme çështjen e lobimit të PD në SHBA.
Siç bëri të ditur zëdhënësja e PD-së, sot KQZ mblidhet në orën 10.00 me një rend dite të caktuar ku do të shqyrtojë procedurën e asgjësimit të materialeve zgjedhore të 25 qershorit, por edhe çështje që vijnë për zbatimin e rendit të ditës.
Pas mbledhjes, kryetari i KQZ-së Klement Zguri pritet të bëjë një deklaratë në lidhje me fondet e PD-së pasi mazhoranca ka kërkuar prononcim prej tij.
KQZ sipas ligjit duhet të administrojë fondet publike të partive në fushatën elektorale si hyrje dhe dalje. PS-ja ka akuzuar PD-në se nuk ka shënuar në KQZ të gjitha fondet e përdorura për lobimin e kryer në SHBA.
Anëtarët e KQZ-së të propozuar nga mazhoranca pritet që të kërkojnë një vendim.
Të drejtën e axhendës në KQZ e ka kryetari, Klement Zguri, i cili është përfaqësues i opozitës. Por anëtarët e mazhorancës që janë në shumicë do të kërkojnë që KQZ të shprehet për çështjen e fondeve.
Ndërkaq, në rendin e ditës KQZ ka djegien e fletëve të votimit të zgjedhjeve të 25 qershorit 2017. Edhe kjo çështje pritet të hapë debat të konsiderueshëm ndërmjet anëtarëve.
Rendi i Ditës:
- Për verifikimin e deklarimeve në formularin e vetëdeklarimit të kandidatëve nga listat shumemërore për këshillat bashkiak në zbatim të ligjit nr.138/2015 ”Për garantimin e integritetit të personave që zg jidhen, emërohen ose ushtrojnë funksione publike”.
- Për verifikimin e deklarimeve në formularin e vetëdeklarimit të kandidatit nga listat shummërore për këshillin e Bashkisë Lezhë, z.Suri Damzi, në zbatim të ligjit nr.138/2015 ”Për garantimin e integritetit të personave që zgjidhen, emërohen ose ushtrojnë funksione publike”.
- Për miratimin e mënyrës së asgjesimit të fletëve të votimit, administrimin e dokumentacionit zgjedhor dhe shpenzimeve buxhetore, për hapjen e kutive të votimit dhe kutive të materialeve zgjedhore të përdorura në zgjedhjet për Kuvendin e Shqipërisë datë 25.06.2017, zgjedhjet e pjesshme për kryetarin e Bashkisë Kavajë datë 25.06.2017 dhe zgjedhjet e pjesshme për kryetarin e Bashkisë Kolonjë datë 20.11.2016.
/tesheshi.com/
