Kreu i ri i KQZ-së Klement Zguri që u zgjodh pas marrëveshjes politike PS-PD e ka cilësuar punën e këtij komisioni një rekord historik, ku për herë të parë kemi një rezultat brenda 2 ditëve pas zgjedhjeve.
“Tabulimi i rezultatit këtë herë është mbyllur brenda 47 orëve nga momenti i mbylljes së votimit. Kjo përbën arritje për administratën zgjedhore, ndaj unë përfitoj nga ky fakt për të vlerësuar dhe falenderuar përzemërsisht gjithë ushtrinë e komisionerëve dhe numëruesve, që me shumë lodhje e sakrifica bënë të mundur këtë arritje. Jam i sigurtë se të gjithë shqiptarët janë njëzëri vlerësues dhe mirënjohës për këtë sakrificë”- tha Zguri.
Ai ka bërë publike shifrat zyrtare të këtyre zgjedhjeve.
“Në këto zgjedhje kanë marrë pjesë në votim 1.613.087 zgjedhës, ose 46,72 % e numrit të përgjithshëm.
Në rang kombëtar rezultati paraprak i zgjedhjeve, i mbërritur në KQZ në rrugë elektronike, përmban këto shifra:
Numri i përgjithshëm i votave të vlefshme ka qenë 1.580.778.
Votat janë ndarë sipas subjekteve elektorale si vijon:
- Partia Socialiste 763.999 vota ose 48,33 % e numrit të përgjithshëm të votave të vlefshme, e kthyer ne 74 mandate;
- Partia Demokratike 455.481 vota ose 28,81%, mandate 43;
- Levizja Socialiste per Integrim 225.678 vota ose 14,28%, mandate 19;
- Partia Drejtesi Integrim dhe Unitet 75.938 vota ose 4.8%, mandate 3;
- Partia Social Demokrate 14.988 vota ose 0,95 %, mandate 1.
Partitë e tjera, të cilat nuk kanë kaluar pragun elektoral kanë marrë në totalin e tyre 44.661 vota, ose 2,8 % të votave të vlefshme.”/tesheshi.com/
