Komisioni Qendror i Zgjedhjeve njoftoi se në zgjedhjet e zhvilluara këtë të diel në Kosovë, kanë dalë 41.45 % e qytetarëve me të drejtë vote dhe se tashmë janë mbyllur të gjitha qendrat dhe vendvotimet.
“Procesi ka rrjedhur në rregull. Nuk kemi pasur asnjë rast që do ta cënonte procesin zgjedhor. Në emër të KQZ-së dua të falënderoj të gjithë qytetarët e Kosovës që shfrytëzuan të drejtën e votimit. Po ashtu falënderoj anëtarët e KQZ-së të cilët kryen punën në mënyre profesionale”, ka thënë ValdeteDaka, kryetare e KQZ-së.
Ajo ka falënderuar edhe vëzhguesit vendorë dhe të huaj, policinë, OSBE, KEDS-in.
Daka ka thënë se të gjithë ata që mendojnë se ka pasur parregullsi, kanë mundësi për ankimime, pasi ka nisur afati për ankesa dhe parashtresa.
Në zgjedhjet e së dielës u thirrën për të votuar më shumë se 1 milion e 872 mijë qytetarë, me mundësi votimi në 889 qendra të votimit. Nga votimet e sotme do të përcaktohet përbërja e ardhshme e Kuvendit, i cili ka 120 ulëse. /tesheshi.com/
