Komisioni Qendror i Zgjedhjeve ka vendosur sot që të kallëzojë në prokurori 76 numërues të Tiranës. Akuza mbi ta shtë “falsifikim i rezultateve të votimit në Qarkun e Tiranës në 68 qendra votimi”.
Tjetërsimi i votave u zbulua gjatë rinumërimit të 68 kutive të votimit në Tiranë pas kërkesës së PDIU-së. Sipas kigjit këta numërues rrezikojnë nga 3-7 vjet burg.
Por cila parti ka përfituar më shumë nga “votat e tjetërsuara” në Tiranë?
Sipas rezultatit të publikuar nga KQZ për qendrat e rinumëruara doli në pah se të gjitha partitë e mëdha PD, PS dhe LSI, janë fajtore, por ajo që ka përfituar më shumë nga votat e tjetërsuara është LSI-ja.
“Në total rezulton se ajo që ka mundur të përfitojë më shumë vota në mënyrë të parregullt gjatë procesit të numërimit është Lëvizja Socialiste për Integrim. Në total LSI ka arritur të “vjedhë” 74 vota në 64 kutitë e hapura dhe të rinumëruar. Bie në sy fakti se vetëm në disa raste asaj i ishin mohuar 6 vota ndërkohë që në shumicën e kutive të tjera asaj i ishin shënuar 82 vota më tepër se sa kishte realisht në kuti.
Sa i përket LSI-së, në tabelën e detajuar për çdo qendër votimi bie në sy se në dy raste asaj i janë shtuar në mënyrë të padrejtë nga 10 vota. Po ashtu është fakt se në të dyja rastet ajo që kanë qenë dëmtuar ka qenë LIBRA. Në vend të dytë si forca që ka përfituar më shumë në mënyrë të pamerituar gjatë procesit të numërimit të votave në këto 64 kuti është Partia Demokratike.
Demokratët kanë mundur të “vjedhin” 68 vota në total. Ndërkohë që gjithsesi në disa kuti asaj i janë mohuar 30 vota por në shumicën e kutive të tjera asaj i janë shtuar 98 vota më shumë se sa ka pasur realisht në kuti. Nga tabela e detajuar e rezultateve rezulton se PD në dy raste ka mundur të marrë 12 dhe 11 vota më shumë se sa ka pasur në kuti, ndërsa në një rast asaj i janë hequr në një kuti 25 vota.
Pjesë e “pazarit” me votat e hedhura në kuti në 25 qershor janë bërë edhe socialistët, të cilët në këto 64 kuti që u rinumëruan në Tiranë mbajnë vendin e tretë si përfituesit më të mëdhenjë në mënyrë të pandershme dhe antiligjore. Në total PS ka vjedhur 38 vota në 64 kuti.
Vota më shumë se ka pasur në kuti i janë shënuar edhe Partisë Komuniste”- raporton sot gazeta Mapo në analizën e këtij rezultati./tesheshi.com/
