Komisioni Qendror i Zgjedhjeve nuk e ka pranuar sot kërkesën e Prokurorisë së Përgjithshme për të hequr mandatin e deputetit të Partisë Socialiste Vladimir Kosta.
KQZ bëri të ditur se e ka shqyrtuar më parë vetëdeklarimin e tij dhe nuk shikon konflikt me mandatin. Kështu, KQZ vendosi t’a rrëzojë kërkesën e prokurorisë.
Prokuria pretendon se deputeti Kosta ka fshehur një gjobë të vitit 2000 në formularin e dekriminalizmit dhe për këtë duhet t’i hiqet mandati. Nga verifikimet e bëra nga prokuroria Kosta rezulton i dënuar nga Gjykata e Tiranës në prill të vitit 2000 për veprën penale të armëmbajtjes pa leje. Për ketë vepër Vladimir Kosta ka marrë si dënim një gjobë 10.000 mijë lekë të vjetra, masë që deputeti nuk e ka deklaruar në formularin e dekriminalizimit.
Nuk është hera e parë që KQZ përplaset me prokurorinë dhe konflikti mes dy institucioneve ka bërë që prokuroria të hapë dhe një hetim ndaj KQZ-së.
Më parë organi i akuzës kërkoi heqjen e mandatit për Shkëlqim Selamit dhe Dashamir Tahirit, të cilat u miratuan.
Ndërsa deputeti socialist Armando Prenga u dorëhoq para se Komisioni Qendror i zgjedhjeve te shqyrtonte kërkesën e prokurorisë.
Në bazë të ligjit të dekriminalizimit KQZ i ka hequr mandatin kryebashkiakut të Kavajës Elvis Rroshi, por ka refuzuar kërkesën e Prokurorisë për heqjen e mandatit për dy kryebashkiakët e tjerë të PS-së, Tërmet Peçi dhe Adriatik Zotkaj./tesheshi.com
