Komisioni Qendror i Zgjedhjeve ka marrë vendim për çregjistrimin e 86 kandidatëve për asamble komunale dhe kandidatëve për kryetar të komunave me 8 vota pro, 1 abstenim dhe 1 kundër.
Nga ky vendim e ka pësuar edhe kandidati i “NISMA”-s për kryetar të Prizrenit, Zafir Berisha, të cilit i pamundësohet gara. Arsyeja sipas raportimeve të mediave është se Berisha, ka qenë i dënuar më 140 euro gjobë për shkak të lidhjes ilegale të energjisë në lokalin e tij.
Anëtarët e KQZ-së ishin të ndarë rreth këtij vendimi.
Anëtari i KQZ-së, Eshref Vishi nga NISMA, tha se është kundër pasi e quajti të padrejtë.
Adnan Rrustemi nga Vetëvendosje kërkoi që të mos largohen nga lista ata që janë dënuar qoftë për një shkelje në komunikacion, por t’i largojnë ata që janë të dënuar për korrupsion apo krime tjera të rënda.
Edhe Betim Gjoshi, nga PDK tha se ligji është arbitrar dhe i fut me një thes të gjithë të dënuarit qoftë për dënime komunikacioni apo dënime tjera. Ai tha se për këtë ligji duhet të ndryshohet menjëherë nga Kuvendi i Kosovës, sepse ligji është arbitrar.
Megjithatë, ai shtoi se pavarësisht kësaj ligji duhet zbatuar. /tesheshi.com/
