Nikos Kotzias ka mbërritur në Tiranë dhe nuk e ka takuar icognito homologun e tij shqiptar, Ditmir Bushati.
Ndryshe nga ç’flitej, ministri i jashtëm grek ka mbërritur në Ministrinë e Punëve të Jashtme bashkë me negociatorët e “Detit” të Athinës, të cilët janë përballur pikërisht për draftin e marrëveshjes me negociatorët e MPEJ shqiptare.
Me këtë rast është mësuar arsyeja e shtyrjes së vizitës së Alexis Tsipras në Tiranë. Ajo ka qenë pikërisht nga mungesa e një drafti final për ndarjen e kufirit detar.
Vetë Bushati nuk dha një datë ekzakte për vizitën e Tsiprasit. Ai tha se çdo gjë do të bëhet në kohën e duhur.
“Jemi në një fazë të re, është bërë progres në disa fusha. Kemi fusha të tjera, ku në ditët në vijim do kemi progres, si leja e drejtimit të automjeteve për shtetasit shqiptarë në Greqi. Presidenti i Republikës ka lëshuar autorizimin, unë kam firmosur plotfuqishmërinë dhe grupi negociator është duke punuar. Besoj se do të biem dakord me Kotziasin për datat e takimit dhe për kalendarin sesi do operojë grupi i punës. Po punojmë edhe për takimin e dy kryeministrave”, tha ministri për Europën dhe Punët e Jashtme.
Vizita e Kotziasit në Tiranë ishte zyrtare, por e papritur. Flamuri grek qëndronte përkrah atij shqiptar përpara godinës, si për t’i uruar mirëseardhjen ministrit grek i cili Tiranën e vizitoi për pak orë.
Bushati dhe Kotzias zhvilluan për disa minuta një takim kokë më kokë, për t’i lënë vendin më pas një dreke jo formale.
Vizita e shefit të diplomacisë greke vjen vetëm dy javë nga dhënia e autorizimit nga presidenti Meta për lëshimin e plotfuqishmërisë për grupin negociator.
Pas Tiranës, Nikos Kotzias do të niset drejt Vjenës, atje ku me homologun maqedonas Dimitrov do të nisë të tjera negociata, po ashtu të rëndësishme, për çështjen e emrit. /tesheshi.com/
