Ish-ministri i Jashtëm i Greqisë, Nikos Kotzias ka bërë me dije se ushtria greke nuk i njeh kufijtë e Shqipërisë.
“Ushtria jonë refuzon që të njohë kufijtë midis Greqisë e Shqipërisë. Ushtria duhet që të bëjë disa veprime me anë të të cilave të shprehet njohja e kufijve prej saj dhe nuk po i bën”, ka deklaruar Kotzias gjatë një interviste për një radio greke, cituar nga Shqiptarja.com.
Këtu është rasti për t’u kujtuar se në krye të Mbrojtjes greke është njeriu që e detyroi atë që të dorëhiqej si ministër i Jashtëm, Panos Kamenos. Publikisht, është thënë se Kamenos nuk pranon paktin me Shkupin, gjë që ka çuar në përplasjen mes tyre. Por me gjasë, gjykuar nga kjo deklaratë e fundit, shkak i sherrit mes tyre mund të jetë dhe Shqipëria.
Në intervistë, ai denoncon dhe forca nacionaliste ekstremiste greke që janë në të njëjtën linjë. “Ka shumë forca në vendin tonë që nuk duan që ne të sanksionojmë juridikisht dhe të themi që ka përfunduar Lufta e Dytë Botërore me Shqipërinë dhe të njohim zyrarisht kufijtë me Shqipërinë. Po hapin tema të vjetra si Vorio-Epiri. Nuk njohin Traktatet e Firences dhe Parisit, si dhe marrëveshjen e Helsinkit. Disa deklarata të tilla synojnë drejt Traktatit të Korfuzit që parashikonte autonominë e Vorio Epirit”, ka deklaruar njeriu që deri dje udhëhiqte negociatat me Shqipërinë, me synimin e hapjes së një epoke të re në raportet mes dy vendeve, duke formuluar e firmosur një marrëveshje te rë detare.
Deklarimet e tij vijnë në një situatë të acaruar mes dy vendeve, pas zhvillimeve në Bularat. Kotzias nuk ka pranuar ta konsideroj si hero të ndjerin Kacifas, dhe ka thënë se ngjarje të tilla nuk duhet të përkeqësojnë raportet mes dy vendeve. /tesheshi.com/
