Ministri grek i Punëve të Jashtme, Nikos Kotzias, ka paralajmëruar Maqedoninë se Greqia do të bllokojë integrimin euroatlantik të saj për sa kohë që kjo nuk pranon ndryshimin e emrit kushtetues.
Kotzias konsideron se çështja e emrit ka rëndësi parësore në marrëdhëniet mes dy vendeve dhe se pa u zgjidhur kjo çështje është e kotë të pritet integrim i Maqedonisë në NATO dhe BE.
“Masat e marra për përmirësimin e marrëdhënieve janë të mirëseardhura por duhet të gjendet zgjidhje definitive, e ajo është çështja e emrit, poashtu e njëjta do të eliminonte pengesën për integrim euroatlantik të vendit”, ka thënë Kotzias.
Kujtojmë se në vitin 2008, në Samitin e Bukureshtit Maqedonia nuk arriti të anëtarësohet në NATO së bashku me Shqipërinë dhe Kroacinë, dhe kjo për shkak të kundërshtimit të Greqisë. /tesheshi.com/
