Kryeministri Edi Rama ka sulmuar sot një ndër sektorët më delikatë të shtetit, Hipotekat, të cilat janë nën drejtimin e LSI-së. Sipas shefit të ekzekutivit, ato vonojnë dhënien e titujve të pronësisë pa arsye.
“Keni ende probleme me hipotekat që shpesh herë i vonojnë dhënien e titujve të pronësisë pa arsye, dhe përfitoj nga rasti që dhe njëherë t’u them se këto janë edhe arsyet pse ne kemi ende shumë për të bërë dhe pse ne jemi kokëulur përpara njerëzve pasi të gjitha ato që kemi arritur nuk janë arsye për të rrahur gjoksin para popullit, por për t’i thënë njerëzve që duam të vazhdojmë këtë rrugë pasi drejtimi ynë, jo vetëm është drejtim i duhur, por i vetmi drejtim për të ndryshuar njëherë e mirë Shqipërinë dhe për të bërë shtet”, tha Rama.
Deklarimet e Rams u bënë nga Vlora, ku ai shpërndau rreth 500 leje të reja legalizimi, duke thënë 115 mijë legalizime janë bërë në vetëm 30 muajt e fundit.
Kryeministrit theksoi se legalizimet falas janë një histori suksesi që po zhvillohet me ritëm dhe përgjegjësi.
Por pse sulmoi Hipotekat? Sepse janë pikërisht ato që nuk e kompletojnë të quajturin “sukses” në legalizime. Letrat e legalizimit që shpërndan Rama poshtë e lartë Shqipërisë, kthehen në të pavlera pasi shoqërohen me hipotekim. Këtë instancë, siç dihet tashmë e drejton LSI-ja; dhe këtu, me shumë se arsye burokratike, shihen arsye politike. /tesheshi.com/
