Nga Blendi Gashi
Ndërsa drejtuesit e partive kosovare gjatë fushatave parazgjedhore premtojnë se një hapësirë më të madhe në kandidimin e grave për kryetarë komunash, kur vjen koha e hartimit të listave një gjë e tillë nuk ndodh.
Edhe për zgjedhjet vendore të 22 tetorit, numri i grave që kandidojnë për kryetarë komunash është minimal, ndërsa kuota e përfaqësimit 30 % nuk respektohet as për asambletë.
Në dallim nga zgjedhjet e 2013-ës këtë vit garojnë më pak gra, atëherë kishte rreth 10 kandidate për kryetare, ndërsa tani janë vetëm 7.
Kandidatet sipas partive
Më zëmergjërja nga të gjitha partitë është treguar PDK-ja e Kadri Veselit, e cila ka kandiduar tre femra për kryetare komunash.
Në Mitrovicë garon me Valdete Idrizin, në Pejë me Sabiha Shala në Mitrovicën e Veriut Gonxhe Çaushi.
Ndërsa LDK-ja e Isa Mustafës ka kandiduar vetëm me një grua, ajo është Hyrijete Isufi kandidate për kryetare në komunën e Hanit të Elezit.
Edhe Nisma për Kosovë ka kandiduar një grua, ajo është Anila Kastrati kandidate për të marrë kreun e komunës së Gjilanit.
Alternativa do të kandidojë edhe për një mandat deputeten e zgjedhur Mimoza Kusari-Lila.
Një femër si kandidate për kryetare komune ka kandiduar edhe partia FJALA e Gëzim Kelmendit. Ekonomistja Eneida Kelmendi është e përzgjedhura e kësaj partie.
Pse VV nuk kandidoi asnjë femër?
Në dallim nga të gjitha partitë e lartpërmendura, Lëvizja Vetëvendosje e Visar Ymeri nuk ka kandidauar asnjë grua për kryetare komunash. Arsyeja është se VV në lokalet e 2013-tës ishte partia me më shumë kandidate femra.
Ky mosvlerësim nga ana e VV-së ndaj shumë anëtareve të saj, veçanërisht atyre deptuteve shumë të zëshme në legjislaturën e kaluar, është vërtet i çuditshëm dhe e pashpjegueshëm, pasi të paktën një prej tyre ka mundur lehtë të fitojë besimin e qytetarëve.
Ajo është Aida Dërguti (ish-nënkreytare e Kuvendit), një nga vetëvendosëset më të respektuara që do të kishte gjasa të mëdha të fitonte komunën e saj, Vushtrrinë.
As nga VV e as nga partitë tjera nuk ka pasur një arsyetim për numrin kaq të pakët të grave të përzgjedhura si kandidate për kryetare komunash.
Gruaja në politikë, përkeqësohen shifrat
Vendimi i partive për të kandidaur shumë pak gra për kryetare e asambleiste në komuna nuk i ka pëlqyer aspak Agjencisë për Barazi Gjinore (ABGJ), e cila u ka kujtuar subjekteve politike, respektimin dhe zbatimin e Ligjit për Barazi Gjinore të Kosovës, neni 6-të, pika (8-të) për përfaqësim të barabartë gjinor në të gjitha organet legjislative me përfaqësim 50-të për qind për secilën gjini.
Kjo agjencia rikujton se një përfaqësim i barabartë gjinor në vendimmarrjen politike e legjislative të vendit është reflektim dhe zbatim i drejtpërdrejtë si dhe jetëson Kushtetutën e Kosovës, sipas së cilës “barazia gjinore është vlerë themelore për zhvillimin demokratik të shoqërisë, mundësi të barabarta për pjesëmarrje të femrave dhe meshkujve në jetën politike, ekonomike, sociale, kulturore dhe në fushat të tjera të jetës shoqërore.”
“Fatkeqësisht, edhe këtë raund zgjedhjesh lokale, Kosova do të dështojë të shënojë përparimin e dëshiruar për avancimin e grave në vendim-marrje, do të dështojë të përmbushë obligimin ligjor dhe Kushtetues në përmbushjen e agjendës për barazi gjinore në Kosovë.
Zgjedhjet lokale të vitit 2013-të rezultuan në zgjedhjen e një kryetareje komune. Me këto arritje dhe rezultate nga zgjedhjet e kaluara dhe me kandidaturat e propozuara aktualisht edhe zgjedhjet lokale të 2017-ës, avancimi i gruas në politikën lokale si udhëheqëse institucionesh qeverisëse përballet me një rrugëtim në vend numëro, e madje përkeqësues”, thotë kjo agjenci. /tesheshi.com/
