Në kulmin e një krize të paprecedentë politike, Kosova shënon humbjen e parë të një jete për shkak të infektimkit me koronavirus.
IKSHPK bën të ditur se Klinika Infektive informoi sot se një pacienti 82-vjeçar nga Dumnica e Podujevës, ka përfunduar me vdekje në ora 9:00.
“Pacienti lindur më 1938 fshati Dumnicë, Komuna Podujevës është pranuar në Klinikën Infektive më 16.03.2020 në ditën e 6 të sëmundjes me shenja të infiltrimit pulmonar dhe pneumonisë masive majtas është diagnostikuar në Laboratoret e IKSHPK me SARS-CoV-2. Pacienti ka patur edhe sëmundje shoqëruese kronike: kardiake dhe sëmundje kronike mushkërore (SPOK). Rasti në fjalë është kontakt nga djali i tij dhe vajza e tij pozitive. Të gjitha kontaktet e rekomanduara për vetëizolim”, thuhet në njoftim.
Ndërkohë, ministri i Shëndetësisë Arben Vitia, ka njoftuar se do të propozojë masa të reja sa i përket mbrojtjes nga koronavirusi.
Një postimi të gjatë në Facebook, Vitia shkruan se“janë testuar gjithsej 567 mostra të dyshimta me COVID-19 dhe prej tyre, gjithsej tridhjetë e një (31) raste kanë rezultuar pozitive.
“Bazuar në situatën e krijuar dhe me qëllim të ruajtjes së shëndetit të popullatës, sapo kërkova nga Kryeministri, Albin Kurti, që t’i propozojë Qeverisë masat shtesë në kuadër të gjendjes emergjente me qëllim të mbrojtjes së shëndetit publik. Këto masa do të diskutohen edhe me ministritë e linjave dhe do paraqiten në mbledhjen e Qeverisë. Të gjitha këto masa do të shpjegohen saktë për qytetarët pasi të kenë marrë miratimin.
Të dashur qytetarë,
Bashkëpunimi juaj, vetdisiplina dhe kujdesi janë jetike në këtë betejë ku po sfidohen seriozisht edhe sistemet më të avancuara shëndetësore.
Është jashtëzakonisht e rëndësishme që të jemi bashkë në administrimin e kësaj situate.
Ju lutem që të mirëkuptoni, ndiqni dhe të zbatoni të gjitha masat e reja. Kujdesi për vetveten dhe familjet tona, solidariteti dhe përgjegjshmëria janë mënyra që do të na e mbrojë shëndetin e secilit.
Si asnjëherë më parë kërkohet nga ju të jeni në krye të përgjegjësisë shoqërore duke e mbrojtur vendin. Shpresoj e besoj se të gjithë bashkë do t’ia dalim”, shkruan Vitia. /tesheshi.com/
