Kompania e Deminimit e Forcës së Sigurisë së Kosovës nisi sot operacionet për deminim humanitar dhe pastrim të fushëbetejave. Opercionet zhvillohen në tre lokacione të ndryshme, ku është paraparë fillimi ose edhe vazhdimi i punës për pastrimin e fushave të minuara dhe fushëbetejave.
Ministria e FSK-së në njoftimin e sapodërguar thekson se, Kompania e Deminimit, sipas planit operacional ka filluar punën dhe aktivitetet me tre ekipe deminerësh në terren, në tre lokacione. Në Zagerm të komunës së Pejës dhe në Ferizaj, do të kryhet pastrimi i fushëbetejave, ndërsa në Seqishtë të komunës së Hanit të Elezit do të kryhen operacionet e deminimit humanitar.
Kompania e Deminimit të Regjimentit të Mbrojtjes Civile të FSK-së ka kryer të gjitha përgatitjet e duhura, dhe operacionet e deminimit pritet që do të shkojnë mbarë edhe këtë vit. Gjatë sezonit dimëror janë zhvilluar trajnime rifreskuese si dhe përgatitjet tjera të nevojshme në mënyrë që sezoni i deminimit 2015, nga 30 marsi deri me 30 nëntor të zhvillohet me sukses.
Kompania e deminimit gjatë sezonit dimëror, atëherë kur kushtet atmosferike nuk lejojnë operacionet në terren, vazhdimisht, për çdo vit angazhohet në fushatë vetëdijesimi për rrezikun nga minat dhe mjetet tjera eksplozive të pashpërthyera. Pjesëtarët e Kompanisë së deminimit kanë mbajtur ligjërata në shumë prej shkollave fillore në disa komuna, Prishtinë, Mitrovicë, Pejë, Gjakovë, Ferizaj dhe Gjilan, ku i kanë njoftuar nxënësit mbi rrezikun nga mjetet shpërthyese si dhe i kanë udhëzuar për proceduarat që duhet ndjekur në rastet kur i hasin ato.
Gjatë vitit 2014, Kompania e Deminimit me operacione të suksesshme në deminim humanitar dhe pastrim të fushëbetejave ka pastruar 375,324 metra katrore sipërfaqe, dhe ka demoluar 569 mjete shpërthyese të pashpërthyera.
Ndërsa Ekipet për Eliminimin e Mjeteve të Pashpërthyera në kuadër të Kompanisë së Deminimit, të cilat kujdestarojnë 24 orë gjatë 7 ditëve të javës, në Prizren dhe Pomozotin, brenda vitit 2014 kanë pranuar 360 thirrje për intervenim si dhe kanë demoluar 449 mjete shpërthyese.
Në Kosovë, në raportet e Policisë, rastet e gjetjes së mjeteve shpërthyese janë thuaja të përditshme. Shumë mjete shpërthyese të pashpërthyera, përfshirë zonat e minuara nga forcat serbe, kanë mbetur që nga lufta e para mëse 16 viteve.
