Brenda tetë muajsh janë arrestuar 152 nxënës të shkollave të mesme në tërë Kosovën për shkak të përdorimit të narkotikëve, ndërkohë që policia ka konfiskuar edhe një sasi të konsiderueshme lënde të ndaluar.
Gjatë kësaj periudhe gjithsej janë konfiskuar 63 gramë marihuanë brenda shkollave, 97 gramë marihuanë në oborr të shkollave dhe 4 kilogramë e 50 gramë marihuanë në afërsi të shkollave.
Ajo që mbetet shqetësuese është mosha e përdoruesve të këtyre drogave që kryesisht janë të rinj.
Safet Blakaj, nga Qendra Mediko-Psikoterapeutike “Labirint” e cila merret me rehabilitimin e përdoruesve të narkotikëve, ka thënë se vitin e fundit mosha mesatare e përdoruesve të narkotikëve ka rënë në 16 vjet për dallim që para disa vitesh ka qenë 21 vjeç.
“Ne e kemi përcjellë gjatë viteve se sa po bie apo po rritet mosha mesatare e fillimit të përdorimit të drogave. Kohët e fundit, pra vitin e fundit ajo moshë ka rënë dukshëm pra 16.2 vjeç, që do të thotë se kjo është mosha mesatare kur fillojnë përdorimin e drogës klientët të cilët paraqiten në qendrën tonë që kërkojnë trajtim ose ndonjë lloj ndihme tjetër. Nëse këtë shifër e krahasojmë me vitin 2007 është shumë një ndryshim i madh ose rënie e madhe e moshës së fillimit të përdorimit të drogave, për shembull në atë vit ka qenë diku 21 vjeç, kjo është një rënie e madhe”, ka deklaruar Blakaj për Kosova Press.
Ai tregon edhe për lloje të substancave narkotike që përdoren më shumë nga të rinjtë.
Sipas tij, ka rënie të përdorimit të heroinës duke e cilësuar këtë si diçka të mirë, ndërkohë që thotë se është brengosëse rritja e përdorimit të kokainës, veçmas në kryeqytet.
Kujtojmë se ditë me parë, kryeministri Ramush Haradinaj u takua me përfaqësuesit e institucionet e sigurisë duke kërkuar angazhim shtesë për luftimin e narkotikëve në shkolla. /tesheshi.com/
