Për gjashtë muajt e parë të këtij viti, Këshilli i Pavarur Mbikëqyrës për Shërbimin Civil të Kosovës (KPMShCK) ka pranuar 400 ankesa nga shërbimi civil dhe aplikuesit për punësim në të.
Për 244 ankesa, një kolegj i këtij Këshilli tashmë ka marrë vendim, ndërsa të tjerat pritet që të shqyrtohen deri në fund të vitit.
Shkëmb Manaj, drejtor i këtij Këshilli ka thënë se këto vendime të marra nuk po zbatohen nga institucionet lokale e qendrore.
“Tek niveli komunal, prijnë Komuna e Prishtinës. Komunat e tjera i kanë zbatuar të gjitha vendimet e këshillit, kurse komuna e Prishtinës për vitin 2016 ka pasur një numër të konsiderueshëm të vendimeve që nuk i ka zbatuar”, ka thënë Manaj, në një intervistë për “Ekonomia Online”..
Por sipas tij përveç komunës së Prishtinës edhe disa nga institucionet qendrore nuk po shprehin vullnet të zbatojnë këto vendime.
“Në niveli qendror janë disa institucione, si Administrata Tatimore, Ministria e Infrastrukturës, ajo e Punëve të Jashtme”, ka deklaruar ai.
Por moszbatimin e vendimeve, Manaj thotë se Këshilli njofton kryeministrin dhe kryetarin e Kuvendit, të cilët janë të obliguar që të marrin veprime të mëtejshme kundër këtyre institucioneve.
Palët e pakënaqura me vendimet e Këshillit sipas tij mund t’i drejtohen gjykatës. “Çdo vit, rreth 25% të vendimeve të Këshillit përcillen për në gjykatë”, tregon Manaj. /tesheshi.com/
