Partitë politike kosovare në vazhdimësi kanë fshehur burimet financiare, përjashto këtu Lëvizjen Vetëvendosje.
Mënyra se si ato financohen vazhdon të jetë e paqartë, e sidomos mënyra e financimit gjatë fushatës zgjedhore ku derdhin jo pak para në reklama televizive, e gjëra të tjera të ngjashme.
Por, dy ditë para nisjes zyrtare të fushatës partitë kanë nënshkruar deklaratën për rritjen e transparencës financiare gjatë fushatës zgjedhore.
Shpend Emini nga Instituti Demokracia në Zhvillim tha se edhe pse në 2012 ka pasur auditim normal, kjo s’ka ndodhur në zgjedhjet e 2014.
“Mungesa e auditimit është e dëmshme. Ky problem është adresuar dhe nga Komisioni Evropian në Raportin e Progresit. Zbardhja e fondeve të financimit të partive do të ishte hap i madh drejt transparencës. Deklarata që nënshkruhet sot shpreh vullnetin e partive politike për transparencën financiare”, tha ai.
Kurse, kryetarja e Komisionit Qendror të Zgjedhjee, Valdete Daka shprehu bindjen se kjo i kontribuon një procesi të mirëfilltë zgjedhor.
“Fatkeqësisht s’kemi kompetencë në auditim të subjekteve politike. Shpresoj që kuvendi i ardhshëm do t’i marrë kompetencat e veta sepse askush se ka ndaluar të bëjë auditimin e fushatës zgjedhore. Transparenca është themel i demokracisë shpresoj që kësaj here subjektet politike vet do t’i bëjë publike raporte financiare.
I ftoj subjektet politike që ta zbatojnë ligjin t’i bëjnë publike shpenzimet e fushatës zgjedhore, sepse vetëm kështu do të kemi transparencë të plotë të fushatës zgjedhore”, tha ajo./tesheshi.com/
