Federata e Futbollit të Kosovës ka paditur në FIFA trajnerin e kombëtares serbe Dragan Stojkoviç, për shkak të, siç thuhet, komenteve të tij gjatë ndeshjes së xhiros së tretë të fazës së grupeve të Kupës së Botës kundër Zvicrës.
Në deklaratë ndër të tjera theksohet se “urrejtja e pakuptimtë dhe absurde që ka ushqyer opinionin në shtetin fqinj ndaj popullit shqiptar në përgjithësi” kërkon reagim nga FIFA.
“Vendosja e parullave me mesazhe politike dhe thirrje raciste drejtuar shqiptarëve u dëgjua gjatë gjithë ndeshjes, të cilat u raportuan edhe nga mediat botërore. Është e pakuptimtë dhe absurde urrejtja që ka nxitur prej vitesh opinionin në shtetin fqinj ndaj popullit shqiptar në përgjithësi. Federata e Kosovës kërkon nga FIFA hetim për këtë rast dhe sanksione për Federatën e Futbollit të Serbisë, që të zhduken njëherë e përgjithmonë thirrjet fashiste nga stadiumet e futbollit dhe ngjarjet si Kupa e Botës”, thuhet në deklaratë dhe shtohet:
“Askush nuk mund të kuptojë dhe justifikojë thirrjet e tilla nga tifozët e një ekipi pjesëmarrës në Kupën e Botës, veçanërisht tani kur Europa kërcënohet nga një situatë e brishtë sigurie, si rezultat i agresionit të paprovokuar të Rusisë në Ukrainë. Federata e Futbollit të Kosovës do të mbrojë fuqishëm vlerat dhe dinjitetin e vendit dhe popullit të tij, por në të njëjtën kohë edhe vlerat që përcjell futbolli në përgjithësi, që janë bashkimi mes njerëzve, shpresa, gëzimi dhe pasioni për gjithëpërfshirje. Skuadrat dhe tifozët me sjellje dhe filozofi të urrejtjes nuk duhet të kenë vend në ngjarje të tilla të rëndësishme sportive si Kupa e Botës në Katar”.
Një zhvillimi i tillë vjen pas ndeshjes Zvicër-Serbi, ku për shkak të protagonizmit në fushë të dyshes shqiptare Xhaka-Shaqiri në përfaqësuesen helvete, serbët shpërthyen në shfaqje urrejte nacionaliste për shkak të gtë qënit të tyre shqiptarë të Kosovës.
Vetë trajneri Stojkoviç, një ish-yll i viteve ’90 me përfaqësuesen jugosllave, u dëgjua duke sharë nëpër dhëmbë. Ndryshe, ai thirret si Pixi. /tesheshi.com/
