Siç nuk pritej, janë zëvëndësuar 10 deputetët e Listës Serbe të dorëhequr para pak ditësh nga Kuvendi i Kosovës, në kuadër të një bojkoti të ngjashëm me atë të opozitës shqiptare në parlament e zgjedhjet lokale në 2019-ën.
Kështu, 10 deputetë të tjerë serbë janë betuar sot në organin më të lartë ligjvënës në Kosovë, 9 prej të cilëve sërish nga Lista Serbe, sërish ngjashëm me atë që ndodhi me opozitën në Shqipëri.
Ata janë: Millan Kostiç, Zoran Maksimoviç, Svetislav Gjokiç, Ksenija Bozhoviç, Radosh Mihajloviç, Bilana Makshiç, Milan Joksimoviç, Nenad Radenkoviç, Olivera Zdravkoviç dhe Cvetko Velkoviç, deputet i partisë Iniciativës qytetare për Liri, Drejtësi dhe Mbijetesë.
Komuniteti serb, si më i madhi në mesin e komuniteteve pakicë në Kosovë, i ka të garantuara me Kushtetutë dhjetë vende në Kuvendin e Kosovës, i cili ka gjithsej 120.
Tashmë, sfidë mbetet zëvëndësimi i katër kryekomunarëve të dorëhequr në Veri, për të cilët Presidentja Osmani ka shpallur 18 dhjetorin si datë zgjedhjesh të pjesshme aty.
Nga ky zhvillim parlamentar mundet që emra të tjerë serbësh të “marrin zemër” e të kandidojnë për katër komunat përkatëse me shumicë serbe.
Nuk dihet nëse një rol ndërkombëtar në këtë zhvillim të fundit, me synim krijimin e një precedenti për të mundur një precedent; pra zëvëndësim pëtr të mundur bojkotin.
Në Shqipëri kjo ndodhi, ndaj sot opozita vuan nën pendesë atë që bëri më 2019-ën, duke mbyllur kështu çdo mundësi që kjo të ndodhë përsëri. /tesheshi.com/
