Pas zhvillimit të disa mbledhjeve të përbashkëta me Shqipërinë, qeveria e Kosovës në mars të këtij viti do ta zhvillojë një me Maqedoninë, por që ende nuk është caktuar një datë.
Kjo është bërë e ditur pas takimit që zhvilloi zv.kryeministri kosovar Enver Hoxhaj me kryeministrin maqedon, Zoran Zaev, ku diskutuan për një etapë të re të marrëdhënieve në mes të dyja vendeve, siç thane do të jetë përmbajtjesore dhe me projekte konkrete bashkëpunimi.
Hoxhaj në emër të qeverisë së Kosovës, ka dërguar mbi njëzet propozime për marrëveshje dhe tema të diskutimit për mbledhjen e përbashkët, duke nisur nga bashkëpunimi ekonomik e tregtar, lëvizja e lirë e njerëzve dhe mallrave, bashkëpunimi ndërkufitar, arsimor, kulturor, si dhe në fushën e drejtësisë.
Hoxhaj dhe Zaev, janë pajtuar se viti 2018 ka potencial të jetë viti i shteteve të rajonit dhe i shënimit të progresit në proceset e integrimit euro-atlantik.
Përveç takimit me kryeministrin Zaev, Hoxhaj ka takuar edhe zv. kryeministrin Bujar Osmani dhe ministrin e Diasporës, Edmond Ademi, ku kanë biseduar për bashkëpunime të reja në fusha të interesit të përbashkët. /tesheshi.com/
