Zbatimi i ligji për personat e verbër ka hasur në disa vështirësi. Kështu është vlerësuar në konferencën e organizuar në kuadër të javës ndërkombëtare “Shkopi i Bardhë” për personat e verbër në Kosovë.
Zv.kryeministri, Enver Hoxhaj, ka premtuar se deri në fund të këtij viti do të zbatohen ato pjesë ligjore që deri më tani nuk janë vënë në funksionim.
Ai ka përgëzuar Shoqatën e të Verbërve të Kosovës për vendosmërinë e madhe për të përfaqësuar të drejtat e të gjithë anëtarëve të kësaj shoqate.
“Dua t’iu siguroj sot që ne do të bëjmë përpjekje të shohim pse ka ngecur ligji dhe të ndihmojmë në zbatueshmërinë e tij duke ndihmuar edhe financiarisht. Punësimi është prioritet i Qeverisë së Kosovës, ndaj jam i bindur se ka disa ministri dhe drejtori të nivelit komunal ku mund të punësohen disa anëtarë të shoqatës tuaj”, theksoi Hoxhaj.
Kryetari i Shoqatës së të verbërve të Kosovës, Bujar Kadriu, ka theksuar rëndësinë që ka promovimi i të drejtave të barabarta në shoqërinë e Kosovës.
Sipas tij, përkundër vështirësive që ka në zbatimin e ligjit për personat e verbër, komuniteti i të verbërve të Kosovës ka avancuar. Ndërkaq për funksionalizmin e këtij ligji, ai ka bërë thirrje ndaj institucioneve të vendit që të ndihmojnë në zbatimin e tij.
“Shoqata e të Verbërve vlerëson se ligji për personat e verbër ka ngecur. Prandaj bashkërendoni veprimet sepse ato nene duhet të jenë të zbatueshme dhe prekin drejtpërdrejt jetën e personave të verbër në Kosovë”, tha ai. /tesheshi.com/
